Servizos extra para a Cidade Imaxinaria e o concerto de Bob Dylan

Con motivo da celebración da Cidade Imaxinaria Primavera na Cidade da Cultura o vindeiro sábado 27 e o concerto de Bob Dylan no Multiusos o luns 29, TUSSA ofrecerá dous servizos especiais durante os dous días para facilitar o acceso aos recintos dende o centro da cidade.

> Sábado 27: Cidade Imaxinaria

Regresa, un ano máis, a Cidade Imaxinaria á Cidade da Cultura. Terá lugar o sábado 27 de abril a partir das 17:00. Como a #Liña9 non funciona os sábados pola tarde, as opcións para subir ata o Gaiás en transporte público serán as seguintes:

➢ #ServizoEspecial: será un autobús que funcionará entre a pza. de Galicia (#Parada410, diante do Massimo Dutti) e a CdC cunha frecuencia de 40 min. A primeira saída dende o Gaiás será ás 14:00 e a última ás 21:20. Dende o Ensanche, o primeiro bus partirá ás 14:20 e o último ás 21:00. Dende a pza. de Galicia, este bus seguirá por Virxe da Cerca seguindo o itinerario da #Liña9, coa única excepción de que non accederá ao Multiusos de Sar na viaxe de ida nin na de volta. As tarifas serán as habituais.

Os horarios detallados son: saídas dende a Cidade da Cultura: 14:00, 14:40, 15:20, 16:00, 16:40, 17:20, 18:00, 18:40, 19:20, 20:00, 20:40, 21:20.
Dende a praza de Galicia: 14:20, 15:00, 15:40, 16:20, 17:00, 17:40, 18:20, 19:00, 19:40, 20:20, 21:00.

➢ #LiñaC11: aínda que o lóxico e o máis practico sería acceder a través do servizo habilitado para a ocasión, a #LiñaC11 conta con tres prolongacións á Cidade da Cultura os sábados tarde, que eles mesmos recomendan na web aínda que os horarios sexan erróneos. Os servizos desta liña con paso por Xeneral Pardiñas ás 17:30, 19:45 e 20:00 subirán ata o Gaiás.

> Luns 29: concerto de Bob Dylan

O luns 29 de abril ás 21:00 Bob Dylan ofrecerá no Multiusos Fontes de Sar o que será o único concerto en Galicia da súa última xira. Ante a escaseza de servizos de transporte ordinarios ata o recinto, TUSSA porá en marcha o habitual #ServizoLanzadeira que se emprega para os eventos no Multiusos. Deste xeito, poderase acceder a través:

Punto de saída do #ServizoLanzadeira.

➢ Do #ServizoLanzadeira: de xeito continuado (isto é, que sempre haberá un bus ao que subirse) dende as 17:00 ata as 21:00. Sairá dende o carril bus do Hórreo, onde comeza a escalinata que baixa á estación de trens. Irá directo ata o Multiusos, sen facer paradas. Manterase en sentido inverso ao remate do concerto, a partir das 22:45.

➢ Da #LiñaC11 (cada 12 min): todos os servizos comprendidos entre as 17:00 e as 21:00 prolongaranse ata o Multiusos. Non sabemos se se reforzará a liña cun autobús máis, pero dende logo cremos que sería o máis conveniente tendo en conta o percorrido extra nun día laborable (hai máis tráfico que durante as fins de semana). No centro, discorre por Xeneral Pardiñas e pza. de Galicia.

➢ Da #Liña9 (cada hora): no seu percorrido habitual accede ao Multiusos. Sae ás XX:30 de Casas Novas e sobre as XX:40 para na Senra. Logo continúa por Virxe da Cerca, Pastoriza, Anxo Casal, Rodríguez de Viguri e Fontiñas.

➢ Das #LiñaC5 e #LiñaC6 (cada hora): unicamente as recomendamos para acceder dende zonas periféricas da cidade que non queden cubertas por algunha das outras alternativas, xa que teñen pouca frecuencia e son moi habituais os retrasos.

Fontes de información:
Cidade da Cultura
TUSSA (I) e TUSSA (II)
Imaxes:
Cidade da Cultura
Ticketmaster
Google Maps

A reorganización viaria no entorno do túnel do Hórreo elimina a #Parada088

Dende comezos de abril, a avenida de Lugo goza dunha nova reordenación do tráfico que facilita as manobras dos condutores e mellora notablemente a seguridade viaria na zona. Concretamente, actuouse en dous lugares: no cruzamento da avenida coa SC-20 (eliminando unha perigosa incorporación) e nos arredores da entrada este do túnel do Hórreo. Neste último punto, viuse afectada a operatividade da #Parada088, que quedou suprimida para sempre.

Novo aspecto da avda. de Lugo no entorno do túnel do Hórreo.
Fonte: Concello de Santiago.

No transporte urbano, esta #Parada088 só servía á #LiñaC2. Ao quedar excluída, simplemente se derivou aos usuarios á máis próxima, a seguinte, a #Parada694 (Hórreo, fronte á estación de trens). Nela tamén realizaban parada moitas liñas de autobús interurbano, cuxos viaxeiros tamén terán que coller o bus agora na #Parada694. De feito, ao non sinalizar a eliminación do apeadeiro «in situ», son moitas as persoas que seguen a agardar alí erroneamente.

HISTORIA DA #PARADA088

Así lucía a #Parada088 no 2012, cunha marquesiña
non accesible completamente pegada á estrada.
Fonte: Google Maps.

A #Parada088 estivo sinalizada e contou con marquesiña ata a construción do túnel do Hórreo. Un tempo despois de concluír as obras, retirouse a marquesiña e a sinalización horizontal (palabra «BUS» e as liñas amarelas diagonais). Aínda así, a parada non quedou suprimida, senón que se trasladou uns metros máis arriba, a unha isleta na que, en teoría, non podería existir unha parada de autobús.

Lugar onde os autobuses
realizaban a parada ata
hai unhas semanas.

Agora, coa entrada en vigor da liña descontinua que permite aos vehículos procedentes da rotonda inferior de Sar incorporarse ao túnel, o Concello considerou que este punto era o suficientemente conflitivo como para albergar un punto de subida e baixada de viaxeiros, co consecuente vehículo parado na vía. Deste xeito, decidiu suprimir de xeito indefinido a #Parada088.




ALTERNATIVA >> #PARADA694

#Parada694, na que é
habitual encontrar a xente
esperando de pé, ao non
ter onde sentarse.

A alternativa, tanto para a #LiñaC2 como para o bus interurbano, será a #Parada694, no mesma rúa do Hórreo, próxima ao cruce con Santiago León de Caracas e fronte á estación de trens. Este espazo atópase sinalizado verticalmente con dous sinais que delimitan a lonxitude da parada, pero non conta con poste informativo. Neste sentido, e tendo en conta que é a única parada que moitas liñas interurbanas realizan no centro da cidade, ten todas as papeletas para ser un dos lugares nos que a Xunta instale unha das novas marquesiñas (ou polo menos, nós cremos que sería o máis conveniente).

A historia da #Parada694 é máis breve. Foi creada entre 2011 e 2012 (antes só era unha zona de aparcamento, como se pode comprobar en Google Maps) e, ao igual que a #Parada088, só presta servizo á #LiñaC2. As súas condicións de accesibilidade non son as óptimas, pero tampouco as peores: cun pouco de colaboración do condutor, os buses de dous portas da #LiñaC2 poden quedar moi próximos á beirarrúa para a subida de pasaxeiros. Porén, cremos que os grandes e longos buses interurbanos non están preparados para estacionar nesta parada como deberían, polo que non estaría de máis extender o apeadeiro, ocupando un par de prazas de aparcamento máis.

Fontes de información:
Concello de Santiago
Google Maps
TUSSA

O #BusUrbano gaña viaxeir@s en 2018 mentres un terzo da pasaxe viaxa gratis

Se no último post comentabamos que, xa ben entrado o ano, aínda non coñeciamos as cifras do transporte urbano relativas ao ano 2018, o Concello pareceu escoitar as nosas pregarias e publicounas dous días despois. Imos analizalas polo miúdo porque, aínda que no seu conxunto o número de viaxeiros aumentou un 6%, cómpre destacar que no 2017 tivo lugar a folga do transporte de viaxeiros que, tal e como indicaba o propio goberno local, repercutiu nas cifras dese exercicio.

Comparativa 2017-18. Algunhas cifras non poderían ser fieis á
realidade por mor da folga de transporte de 2017.

CIFRAS 2018

O número total de usuarias e usuarios foi de:

7.447.300

Isto supón un incremento dun 5,97% con respecto a 2017, no que a cifra alcanzou os 7.027.665 (419.635 viaxeiros máis). Como vén acontecendo dende hai anos, a máis utilizada foi a #Liña6 (San Marcos – Os Tilos; 16,16% da utilización total), seguida das #LiñaC11 (Circ. de Fontiñas; 15,88%) e #Liña1 (Boisaca – Hosp. Clínico; 15,29%).

Destaca o incremento de usuarios nos servizos especiais, que pasan de ser utilizados por 3.691 persoas a 50.036. Isto débese á participación de TUSSA durante a primeira edición de O Son do Camiño, a pesares de todos os problemas tiveron lugar (un dos días, a Policía mandara suspender o servizo de buses pola masificación de xente).

En canto aos métodos de pago, os bonos ordinario, escolar, mensual e universitario (este último, só para aqueles con TUI anterior ao 1 de xullo de 2017) foron empregados polo 45,89% das persoas. O bono pensionista, por un 32,03%. Ao noso xuízo, esta cifra debería facer reformularnos o modelo de pago que temos e se queremos mantelo. En Compostela, lembramos, os e as pensionistas viaxan practicamente de balde (720 viaxes anuais), sen ter en conta criterios económicos ou similares para a concesión destas viaxes. Polo tanto, estamos a falar de que un terzo dos pasaxe viaxa gratis. Porén, outros colectivos como as persoas con discapacidade ou as desempregadas non gozan de descontos. Estamos seguros de que imos polo bo camiño?


FOLGA DE 2017

Servizos mínimos «teóricos» para
a folga de 2017. Na práctica apenas
se cumpriron.

Hai que ter en conta que durante o 2017 tivo lugar a folga do transporte, que foi secundada polos condutores e condutoras do bus urbano de Compostela nas oito xornadas de paros. Durante todos os martes e mércores, dende o 20 de xuño ata o 12 de xullo, só circularon uns servizos mínimos estipulados de antemán, e que non foron cumpridos na súa totalidade. Isto tivo a súa repercusión nas cifras de 2017, polo que non é axeitado comparalas coas de 2018, pois o aumento / redución de pasaxeiros podería non ser 100% real.

Con todo, ao comparar as cifras de 2018 coas de 2016, seguimos a obter bos resultados. No 2016 empregaron o bus urbano 7.135.858, o que supón un incremento dun 4,36%. Obviamente non é tan acusado como o 5,97% tomando 2017 como ano de referencia.

No tocante ás liñas, todas gañan usuarios excepto a #Liña8, #Liña9, #LiñaP1, #LiñaP3, #LiñaP7 e #LiñaP8. No caso da L9, supoñemos que perde usuarios debido ao seu pésimo funcionamento, con retrasos de ata 20 min en horas punta. No caso das liñas periféricas, a escaseza de frecuencias pode acabar repercutindo na súa non utilización, substituíndo o transporte público polo vehículo privado.

En peor situación se atopan algunhas parroquias do rural que non contan cun só bus urbano en todo o día. É o caso de San Xoán de Fecha ou Namenzo. En teoría, o problema quedará resolto, como non, coa nova concesión, a través dun sistema de transporte a demanda.


CONCLUSIÓNS
Supoñemos que o crecemento de viaxeiros non se debe a factores directamente relacionados co bus urbano, posto que o sistema leva funcionando practicamente sen cambios dende 2012. O único relevante a destacar, a renovación dalgúns vehículos (contadas cos dedos das mans) e a inclusión da cidade na aplicación Moovit, que puido ser un incentivo máis para o usuario —sobre todo turistas— de cara á utilización do transporte público, posto que suple algunhas das funcións que non cumpre a oficial de TUSSA. Con todo, non conta con tempo real nas paradas.

Fontes de información
Concello de Santiago (I)
Concello de Santiago (II)