Novidades: marquesiña no aparcadoiro de Santa Marta e panel de chegadas na #Parada691

Pouco a pouco imos vendo como, tras anos e anos de abandono das infraestruturas relacionadas co transporte urbano, a cidade vai recuperando o pulso (cousas do Xacobeo...). Nestas últimas semanas destacamos dúas novidades: a instalación dun panel de chegadas en tempo real na #Parada691 (Hórreo, estación de trens) e dunha marquesiña na parada do aparcadoiro de Santa Marta da #Liña1.

Marquesiña en Santa Marta
No primeiro caso —segundo puidemos saber durante o último Pleno da Corporación—, a marquesiña de Santa Marta foi demandada polo voceiro do Partido Popular, Alejandro Sánchez-Brunete, nun Consello de Administración de TUSSA. A petición foi admitida e o Goberno municipal reservou unha partida nos seus orzamentos «técnicos» para este propósito. Non foi ata o pasado luns cando a puidemos ver instalada, e polo que a nós respecta, deixa moito que desexar. Así loce:

Non é o suficientemente grande como para atender a alta demanda do estacionamento. En Santa Marta aparcan moitos condutores polas mañás e en horas punta pode chegar a haber en torno a quince persoas agardando ao bus. Na marquesiña caben dez e sentadas, catro. Ademais, no relativo á información ao usuario, non se instalou ningún poste indicador apeadeiro e tampouco o plano coas liñas e horarios que adoita poñerse naquelas paradas que contan con marquesiña.

E aínda que xa sexa fantasear, tampouco estaría de máis ter construído unha plataforma elevada sobre o chan que facilitase o acceso ao autobús. Estamos a falar dunha zona en pendente na que non hai beirarrúas, polo que a tarefa pódeselle complicar a máis dun, especialmente ás PMR. Este tipo de pequenos detalles nunca se teñen en conta en Compostela.

Panel no Hórreo
Na zona do Hórreo, localización da actual estación de trens e da futura Intermodal, vén de instalarse un panel de chegadas en tempo real. Concretamente fíxose na #Parada691 e o modelo é idéntico ao que hai pouco máis dun ano se colocou en Virxe da Cerca.

As vantaxes, como xa indicamos no seu día, pasan pola utilización das cores de cada liña, normalmente infrautilizadas e mesmo cambiadas na app maisbus. Este panel tampouco presenta problemas para visualizalo cando lle da a luz solar de fronte, como si o fan outros (praza de Galicia e rúa da Rosa, entre outros).

Non nos pode gustar máis o aspecto que loce o novo panel de chegadas da #Parada660😻

✅ Empregando —por fin— as cores de cada liña

🌞 Esperemos que non haxa problemas de visibilidade cando lle dea o sol (como ocorre no da #Parada366, por exemplo)

Bo traballo! @maisbus pic.twitter.com/rG9HQbwFgX

— Bus Compostela 🚍 (@BusCompostela) September 20, 2018

Porén, presenta unha serie de inconvenientes:

• Non se mostra sempre o destino real: esta clase de indicadores mostran a orixe e o destino da liña de forma estática, e non dependendo do punto final real do servizo. Neste caso concreto, por exemplo, a información ofrecida sobre a liña P3 é «Susana - Rúa Valle Inclán», e sempre será esa aínda que a ruta remate ás veces na praza de Galicia. Isto acontece tamén coa liña 6, que non sempre remata en San Marcos para poder prolongarse ata Bando e Vilamaior.
• Só se mostra o próximo bus: a diferenza dos paneis LED laranxas, estes azuis só mostran o próximo bus de cada liña. É dicir, se lle quedan 2 minutos ao 6 temos que intuír por nós mesmos que o seguinte chegará en 22', e para iso hai que controlar as frecuencias.

Tanto a marquesiña como o panel non deixan de ser boas novas para as persoas que empregan o transporte urbano, pero son estas cuestións menores as que sempre acaban por confirmar o que xa sabemos: o noso servizo de transporte urbano é de segunda, e non parece importarlle moito aos nosos dirixentes.

O bus nocturno só funcionará unha noite durante o #Apóstolo2019

Xa estamos en festas!🎉

O venres daban comezo as festas do Apóstolo 2019 co pregón do actor Luis Zahera. Ata o 31 de xullo, a cidade será testemuña dunha infinidade de eventos para todas as clases de persoas e gustos. Destacan os grandes concertos que terán lugar na praza da Quintana, así como os tradicionais fogos nas noites do 24 e do 31.

Por iso, e aínda que moito máis austero que o do ano pasado, porase en funcionamento un servizo nocturno para facilitar a volta a casa de todos os composteláns e compostelás a practicamente calquera punto cuberto pola rede do transporte urbano diúrna. O básico:

➢ 12 liñas (1, 4, 5, 6, 7, 8, C11, P1, P2, P3, P7 e P8).
➢ Saídas dende as cabeceiras ás 00:00, 1:00, 2:00 e 3:00 h. Liñas 4 e 8 tamén ás e medias.
➢ Prolongacións en moitos dos percorridos.
➢ Sistema ideado para desprazarse do centro á periferia, non á inversa.

#Liña1: Rosalía de Castro → Son → Boisaca
➢ Saída dende a #Parada450, en Rosalía de Castro, 87 (cruce con Romero Donallo, ao carón do bar Kampus).
➢ Dende esta cabeceira, percorrido habitual da L1 ata Boisaca con prolongación por Garabal - Son.

#Liña4: As Cancelas ⇆ Casas Novas ⇆ Romaño
➢ Itinerario e cabeceiras habituais da L4.
➢ Funcionará nos dous sentidos: saídas dende Romaño ás 00:00, 1:00, 2:00 3:00; dende As Cancelas ás 00:30, 1:30, 2:30, 3:30.
➢ Por Casas Novas só as viaxes en dirección Romaño

#Liña5:
República Arxentina → Vite
Estación de autobuses → A Rocha Vella
➢ Dous traxectos que funcionarán só no sentido de circulación indicado.
➢ Saídas das cabeceiras (Rep. Arxentina e est. de autobuses) ás 00:00, 1:00, 2:00 e 3:00 h.

#Liña6:
Hórreo → Amio → San Marcos → Bando → Vilamaior
San Caetano → Os Tilos
➢ Dous traxectos, un cara San Marcos e outro en dirección Os Tilos. O primeiro realizará prolongacións por Amio, Bando e Vilamaior (destino final).
➢ As saídas das 00:00, 1:00, 2:00 e 3:00 realizaranse dende o Hórreo (estación de trens) e San Caetano (#Parada552).

#Liña7: rúa Valle Inclán → Fornás → Aríns
➢ Percorrido habitual da L7 (co desvío por obras en Castrón Douro).
➢ Prolongación a Fornás e logo percorrido por Aríns (Lobío, A Pena, rotonda Monte do Gozo, Sanxuás e Torrebranca).

#Liña8: Vidán ⇆ Tanatorio
➢ Xunto coa L4, funcionará tamén nos dous sentidos.
➢ Saídas de Vidán ás 00:00, 1:00, 2:00 e 3:00; dende o tanatorio ás 00:30, 1:30, 2:30 e 3:30.
➢ Cabeceiras e percorrido habitual da L8.

#LiñaC11: circular de Fontiñas
➢ A cabeceira trasládase á rúa Bernardo Barreiro (IES de Sar).
➢ Percorrido habitual do C11, pero só con acceso a Fontiñas unha vez (no traxecto de ida).
➢ Prolongación ata o Multiusos Fontes do Sar.

#LiñaP1: estación de autobuses → Folgoso
➢ Mesmas paradas e percorridos que a P1 diúrna.

#LiñaP2: estación de autobuses → A Choupana → Ortoño
➢ Paradas e itinerario habituais da liña P2.
➢ Dará servizo a toda a zona sur (Santa Marta, A Choupana, Volta do Castro, avda. de Barcelona, etc.) ao non chegar a liña 1 nocturna ata ela.

#LiñaP3: rúa Valle Inclán → Lamas de Abade → A Susana
➢ Paradas habituais da liña P3.
➢ Realizarase a prolongación ata o CIFP Compostela e o IES Lamas de Abade.

#LiñaP7: Virxe da Cerca → Pardaces → A Peregrina → Grixoa
➢ Saídas dende a #Parada660, en Virxe da Cerca, onde a escalinata da praza de Abastos.
➢ Primeiro realizará o percorrido por Pardaces para logo seguir cara A Peregrina e Grixoa.
➢ O núcleo de Miramontes non terá servizo de bus nocturno.

#LiñaP8: rúa Valle Inclán → Roxos → Reborido
➢ Pasará por Roxos e Vilastrexe, onde dará media volta para continuar cara Villestro e Reborido.
➢ Paradas habituais da liña P8.

Para os máis tardóns...

Captura da app maisbus do servizo das 6:00
(San Lázaro - Castiñeiriño) e das 6:20
(Castiñeiriño - Vite).

Para aqueles aos que lle resulten demasiado cedo estes servizos, contan con un que percorre unha gran parte da cidade e que circula todos os días do ano. É o máis madrugador e o menos coñecido de toda a rede, e está incluído de forma oficial dentro da #Liña6, aínda que non segue ao cen por cen o percorrido desta, senón que é unha mezcla das L1, 5 e 6. Isto deriva en que presente algún que outro problema no SAE que pode inducir a confusión. Explicarémolo nun post que lle dedicaremos a este peculiar servizo de primeira hora. 😄

E para o día 25...

En último lugar, o xoves 25 de xullo, día de Galicia e festivo en toda a comunidade, veranse reforzadas as liñas 1 e 6:

➢ #Liña1: reforzo no horario de mañá, con pasos cada 20 min. As viaxes en dirección Boisaca prolongaranse polo Recinto Feiral de Amio.

➢ #Liña6: reforzo durante todo o día. Funcionará como un domingo de inverno, con frecuencias de 30 min. Saídas de San Marcos, de 7:30 a 23:00 h; saídas dos Tilos, de 7:15 a 22:45.

Polémica arredor do bus nocturno
O ano pasado saíu elixido nos orzamentos participativos, no apartado das festas do Apóstolo, o bus nocturno. Púxose en marcha durante as once noites coas últimas saídas ás 4:00 (4:30 no caso das liñas 4 e 8). Para as festas deste ano volveu ser escollida a proposta e todo parece indicar que o novo goberno municipal acabou por desbotala. Só funcionará —polo que sabemos ata o momento— a noite do 24 e non terá paradas a demanda. Ademais, as últimas saídas pasarán a ser ás 3:00, unha hora moi cedo para as que son as festas máis importantes da cidade.

Fontes de información: TUSSA, Orzamentos Participativos «Compostela Decide»
Imaxes: Concello, elaboración propia e app maisbus

TUSSA trasladou a máis de 50.000 persoas a O Son do Camiño

O Concello vén de publicar as cifras oficiais correspondentes ao uso do transporte público para desprazarse ata O Son do Camiño. O número total de usuari@s foi 50.695. Destes, 45.545 (o 89,84%) empregaron os servizos lanzadeira habilitados para a ocasión e os restantes distribuíronse entre as liñas 6 e 7, cunha afluencia maior na primeira. O certo é que non acabamos de entender o sistema de medición nas liñas regulares, posto que se rexistra á persoa cando sube ao bus, pero non en que parada baixa.

O servizo lanzadeira foi prestado con vehículos de
Tralusa e con vehículos «prestados» doutras empresas.

Cifras por día
O venres e o sábado foron os días nos que máis se empregou o bus urbano. Foron entre 15.000 e 18.000 as persoas usuarias dos servizos ofertados. O xoves, o primeiro día do festival, foi o que menos tivo, uns 12.000.

Cifras por franxa horaria
Das catro franxas establecidas por TUSSA (inicio - 15:00, 15:00 - 23:00, 23:00 - 00:00 e 00:00 - fin), as máis empregadas foron, obviamente, as que máis horas abarcaban, é dicir, de 15:00 a 23:00 h  e de 00:00 ao final (en torno as 4:30 ou 5:00 h). Destaca o feito de que, aproximadamente, foi o mesmo o nº de persoas que empregaron o bus tanto para ir como para volver nas distintas xornadas.

Comparativa coa edición anterior
Non hai cifras oficiais das persoas transportadas durante a primeira edición de O Son do Camiño, en 2018. Porén, as cifras da globalidade da rede si recollen o número de persoas que empregaron os servizos especiais durante todo o ano: 50.036. Tendo en conta que no 2019 só neste festival foron 50.695, podemos concluír que o balance dos servizos extraordinarios prestados por TUSSA para determinados eventos é positivo e que está á alza.

Fonte de información: Concello de Santiago
Gráficas (cifras por día e por franxa horaria): Concello de Santiago

Dous servizos lanzadeira atenderán a demanda dos asistentes de O Son do Camiño

Esta semana arrinca por fin a segunda edición do festival O Son do Camiño no Monte do Gozo. Terá lugar durante o xoves 13, venres 14 e sábado 15 de xuño. Este ano, como novidade, TUSSA porá en marcha dous servizos lanzadeira a disposición dos asistentes: un conectará o recinto co centro da cidade e o outro co aparcadoiro que será habilitando no Recinto Feiral de Amio. Complementarán ás liñas 6 e 7, que tamén contan con paradas nas inmediacións do Monte do Gozo.

Mapa proporcionado pola organización do festival cos lugares clave. CLICA AQUÍ se non podes visualizalo correctamente.

Horarios
As dúas liñas que servirán ao festival serán:

> Liña Especial 1 (centro cidade ⇄ Monte do Gozo)
> Liña Especial 2 (Recinto Feiral de Amio ⇄ San Lázaro)

E para ambas as dúas, os horarios serán os seguintes:

> Sentida IDA: servizos cara o festival.
> Sentido VOLTA: servizos cara centro cidade e Amio.

A partir das 23:00, as dúas liñas especiais só realizarán os servizos de VOLTA, polo que o último servizo de IDA sairá ás 23:00 dende o centro da cidade e Amio respectivamente.

As tarifas serán as habituais do transporte urbano, que podes consultar nesta ligazón.

Liña Especial 1 (centro cidade ⇄ Monte do Gozo)
A LE1, no servizo de IDA, conectará o Hórreo (carril bus diante da escalinata da estación de tren) coa rotonda baixo a SC-20, punto onde comeza a rúa das Estrelas. Dende este punto haberá que ir a pé ata o recinto, un traxecto duns 20 min aproximadamente. O ano pasado este servizo continuaba un pouco máis aló, ata o cruce desta rúa con Agra dos Campos. Todo parece indicar que a redución do percorrido foi debida aos incidentes acontecidos na edición anterior. 

O servizo de VOLTA partirá da avda. Fernando Casas Novoa, na confluencia coa rotonda baixo a SC-20, e terá como destino a avda. de Lugo, no cruce co Hórreo. O percorrido realizarase a través da SC-20 para transportar aos viaxeiros da forma máis veloz posible.

Mapa do percorrido e plano explicativo dos puntos de orixe / destino da LE1:

Liña Especial 2 (Recinto Feiral de Amio ⇄ San Lázaro)
A LE2 dará servizo a aquelas persoas que veñan á cidade en vehículo privado e decidan deixalo aparcado no aparcadoiro que se habilitará no Recinto Feiral de Amio. Para aparcar aquí será preciso ter unha entrada ao festival. O servizo de IDA conectará este parking (#Parada429 do transporte urbano) con San Lázaro, nas inmediacións do Palacio de Congresos. Dende aquí ata o Monte do Gozo o traxecto andando ten uns 26 min de duración ou tamén se pode coller a #Liña6 dirección San Marcos (consultar final do post).

A viaxe de VOLTA partirá da parada máis próxima ao Palacio de Congresos, a #Parada560 da #Liña6. Ao igual que a LE1, a LE2 discorrerá pola SC-20 nun traxecto de apenas 5-7 min de duración. Este o mapa do percorrido e das paradas de cada cabeceira:

Outras liñas con paradas preto do festival
As liñas 6 e 7 complementarán ás dúas liñas especiais:

> #Liña6 (cada 20 min): para acceder ao festival (dirección San Marcos), a parada máis próxima ao Monte do Gozo é a #Parada204, Costa de San Marcos (fronte ao hotel Santiago Apóstol), a uns 8 min a pé ata o recinto. Para regresar á cidade coa L6 (dirección Os Tilos), débese coller o bus na de en fronte, a #Parada282.


Paradas da #Liña6 no entorno do hotel Santiago Apóstol.

> #Liña7 (cada hora): é a liña que para máis cerca do Monte do Gozo. Para ir ao festival hai que coller os buses que teñan como destino final Aríns, NON VALEN os que van a Fornás. A #Parada320, na rotonda de Agra dos Campos, será tanto o punto de baixada coma o de subida para os que escollan a L7 para volver a Santiago.


#Parada320 da #Liña7.

Problemas cos buses durante a primeira edición
O ano pasado só funcinou un dos servizos lanzadeira, o que conecta o festival coa estación de trens. Aparentemente non houbo maiores problemas, pero no remate da última xornada, ás 3:45 horas, o Posto Avanzado de Mando decidía suprimir o servizo de autobuses ante a aglomeración de persoas no entorno da parada de Agra dos Campos.

TUSSA enviara 20 autobuses á vez para intentar cubrir toda a demanda, pero resultaron insuficientes ao estar abandonando o recinto practicamente a totalidade das persoas que accederan ao mesmo en transporte público. O xerente da empresa, José Ramón Mosquera, chegou a propoñer que non se cobrararan as viaxes, co obxectivo de axilizar o desaloxo de xente, pero a Policía Nacional preferiu suspendelo.

Os asistentes, máis que da propia decisión, queixáronse de non ser avisados por ninguén. Moita xente seguía a agardar polo bus no lugar indicado tempo despois que fora suspendido. Tampouco agradou a xestión de TUSSA, xa que era obvio que 20 buses non eran suficientes para as miles de persoas que naquel momento abandoaban o festival. Hai que ter en conta que era a primeira vez que se levaba a cabo un servizo lanzadeira de tales dimensións, con horarios amplos e moita demanda de viaxeiros.

Este ano o dispositivo semella estar mellor planificado. Botamos en falta, iso si, sinalización «in situ» na cabeceira da LE1 en Fernando Casas de Novoa: ao non ser unha parada de bus habitual pode resultar algo confuso. Iso si, aínda que a decisión de non deixar pasar á LE ata a rotonda de Agra dos Campos redundará nunha maior fluidez para os viandantes na contorna do festival, quizais elevará demasiado o tempo de traxecto a pé, que rondará os 20 min.

📝 Nota aclaratoria diante das publicacións xurdidas nos últimos días ao respecto da suspensión do servizo de autobuses lanzadeira para o festival O Son do Camiño na madrugada do sábado

— Concello de Santiago (@PazodeRaxoi) 5 de xullo de 2018

Fontes de información:
TUSSA
O Son do Camiño
Concello de Santiago
La Voz de Galicia

O #BusUrbano estrea campaña de concienciación sobre as violencias machistas

No marco do 8 de marzo (Día Internacional da Muller), o Concello vén de estrear unha campaña de concienciación e visibilización das violencias machistas no transporte urbano. A acción consistiu na impresión de 50 vinilos informativos sobre como actuar ante as violencias machistas, que foron colocados en cada un dos autobuses urbanos, na parte traseira de cabina do condutor.

Vinilo que, dende onte, atópase pegado en todos os autobuses.

Os carteis fan fincapé en que, nestes casos, non é a muller a que debe abandonar o vehículo, senón o home. Tal e como indicaba Marta Lois, concelleira de Igualdade, «A clave está en colocar o foco no agresor e non na vítima, de tal xeito que debe ser el quen abandone o espazo público e non a muller agredida».

A campaña foi inaugurada onte nun bus urbano da #Liña6 dirección Os Tilos, concretamente durante o tramo praza de Abastos – rúa da Rosa. Na presentación, ademais de Marta Lois, tamén estivo presente o xerente de TUSSA, José Ramón Mosquera. Este indicou que «case o 60% das persoas que usan o transporte público son mulleres, dun total de 27.000 usuarios e usuarias diarios que ten o servizo na cidade» (chámanos a atención os datos, porque parecen ser os máis actualizados e aos que a poboación non poder ter acceso).

Como aspecto a destacar, resulta cando menos curioso que o Concello elixira precisamente este autobús para a presentación da campaña. Como se pode apreciar na imaxe, a parte traseira da cabina atópase sucia e chea de restos de adhesivos, froito de todos os carteis que aí estiveron pegados (e máis, tendo en conta de que estamos a falar dun vehículo de segunda man). Baixo o noso punto de vista, comprería revisar e limpar esta zona naqueles buses nos que fose necesario, pero está claro que se para o acto de onte non se fixo, menos se vai facer sen ningunha outra «escusa» para xustificalo.

Esta campaña, enmarcada dentro do 8-M, complementa á levada a cabo polo Concello e Castrosua durante o mes de novembro, con motivo do 25-N. Nela tinguiuse un bus da #Liña1 completamente de negro coa mensaxe «Espazo libre de violencias machistas».

🚌🚺⚫️ Non nos pode gustar máis a iniciativa do #BusEnNegro que @GrupoCastrosua realizou para a campaña @galiciaennegro co apoio do @PazodeRaxoi

Que o #TransporteUrbano tamén sirva para concienciar!#ContraAsViolencias#GaliciaEnNegro pic.twitter.com/TzcjmGHWkZ

— Bus Compostela 🚍 (@BusCompostela) 6 de novembro de 2018

Fontes de información:

Concello de Santiago

La Voz de Galicia

Imaxes: 

Concello de Santiago

El Correo Gallego 

Horarios de Nadal nos transportes urbano e metropolitano e no AeroBus

Como cada ano en Nadal, os transportes urbano e metropolitano modificarán os seus horarios por mor da celebración da Noiteboa e Nadal e Noitevella e Aninovo: os días 24 e 31 de xaneiro os autobuses retiraranse máis cedo do habitual, mentres que o 25 de decembro e o 1 de xaneiro retrasarase a hora de inicio do servizo.

Transporte urbano

Os luns 24 e 31 de decembro, ao ser días laborables, as liñas do transporte urbano funcionarán como tal. Sen embargo, as últimas saídas adiantaranse ata as 20:30 / 21:00, dependendo en todo caso de cada liña concreta. Estas serán as derradeiras saídas dende cada cabeceira:

Pola contra, os días de Nadal e Aninovo, os primeiros servizos sairán das cabeceiras ao filo das 10:00 da mañá. Ao ser días festivos, só funcionarán as liñas propias dos domingos, que son as seguintes:

AeroBus ✈

A liña da Empresa Freire que conecta o centro da cidade co aeroporto de Lavacolla (en breves xa Rosalía de Catro😋) tamén sufrirá variacións no seu horario:

Días 24 e 31 de decembro: última saída da pza. de Galicia ás 19:00 e dende o aeroporto ás 20:00.

Días 25 de decembro e 1 de xaneiro: a primeira saída dende a pza. de Galicia será ás 10:00 e dende Lavacolla ás 11:00.

Transporte metropolitano

Os horarios do transporte metropolitano tamén se verán afectados durante estes días especiais:

➢ Rúa da Rosa - Bertamiráns - A Gándara:

Días 24 e 31 de decembro: última saída da rúa da Rosa ás 20:45 e último viaxe dende A Gándara ás 21:15.

Días 25 de decembro e 1 de xaneiro: non haberá servizo porque esta liña só funciona os días laborables.

➢ Est. autobuses - Bertamiráns - Negreira:

Días 24 e 31 de decembro: suprímense as últimas saídas dende Santiago (21:45) e dende Negreira (20:45). As alternativas, as saídas da hora anterior (20:45 e 19:45 respectivamente).

Días 25 de decembro e 1 de xaneiro: o servizo comezará á mesma hora que o fai o resto de domingos e festivos do ano, pero suprimirase a saída dende Santiago das 14:45, e a de Negreira das 15:45.

➢ Est. autobuses - Bertamiráns - Noia: 

Días 24 e 31 de decembro: a última saída cara a Noia será ás 20:00 (suprímese polo tanto a das 21:30) e suprímese o servizo Noia → Santiago das 21:00 (sendo o último as 19:00).

Días 25 de decembro e 1 de xaneiro: os primeiros servizos (tanto dende Noia a Santiago como no traxecto inverso) sairán ás 12:00.

Bo Nadal!😄

Nota: foinos imposible contactar con Autobuses de Calo para coñecer os horarios dos autobuses dende / hacia Milladoiro nestas datas de Nadal.

Fontes de información:
TUSSA

Empresa Freire

Monbus

Hermanos Ferrín

O sábado 8, concerto de @helloweenorg e reforzos no transporte urbano

Nunha das semanas máis raras do ano como é esta, coa ponte da Constitución de por medio, en Compostela poderemos gozar do concerto do grupo de heavy metal Helloween. Isto será o sábado 8, día no que tamén se reforzarán algunhas das liñas para «compensar» o festivo do xoves. Do mesmo xeito, o domingo 9 verase reforzada tamén a #LiñaC11.

Concerto de Helloween

 Sábado 8 de decembro

 19:30 (apertura de portas ás 19:00)

Multiusos Fontes do Sar

Aínda que o cartel indique as 21:30, en realidade
o concerto é ás 19:30. Fonte: RockNRock

Para este concerto habilitarase o dispositivo habitual para eventos no Multiusos Fontes do Sar, que consiste en:

#ServizoLanzadeira: segundo a información proporcionada por TUSSA, funcionará de xeito continuado de 17:30 a 20:00. O punto de saída será o habitual: o #CarrilBus da rúa do Hórreo, xusto diante da escalinata que baixa á estación de trens. Ao final do concerto, ao filo das 22:30 se todo marcha como está previsto, o #ServizoLanzadeira funcionará en sentido inverso (Multiusos → avda. de Lugo, cruce co Hórreo).

Con «de xeito continuado» entendemos que serán varios os autobuses que se destinarán á realización deste servizo, polo que deducimos que sempre vai haber polo menos un na cabeceira do Hórreo. Comentar tamén que este servizo é directo, polo que non realizará ningunha parada entre as dúas cabeceiras.

#LiñaC11: como tamén é habitual nesta clase de eventos, a #LiñaC11 prolongarase ata o Multiusos. Desta vez, farao en todas as viaxes con paso aproximado por Xeneral Pardiñas entre as 17:30 e as 20:00 (cada 20 min.).

Aínda que TUSSA nos confirmara en Twitter que o amañaría, o certo é que ata o de agora, os servizos da #LiñaC11 prolongados de xeito extraordinario ao Multiusos non aparecen reflectidos na app. É dicir, consta coma que fan a súa viaxe habitual, o que pode causar confusións aos usuarios que busquen acceder ao recinto en bus...

Entra agora como reforzo para a xente que vai ao Concerto. En todo caso incorporarémolo. Grazas e bo traballo !!!!

— maisbus (@maisbus) 24 de xullo de 2018

A nosa recomendación

Nós recomendamos ir e regresar do Multiusos utilizando o #ServizoLanzadeira: é máis directo, ten (case) asegurada unha frecuencia e non ten problemas de retraso ao ir directo pola avda. de Lugo. Pola contra, a #LiñaC11, só contará con dous autobuses ao ser festivo que, unido ao intenso tráfico que haberá no entorno do C.C. As Cancelas, acabará por derivar en retencións e retrasos. Mellor non arriscarse.

Reforzos para a finde

- Sábado 8

O sábado 8 de decembro, para compensar os horarios de día festivo que xa haberá durante o xoves 6, as seguintes liñas do transporte urbano se verán reforzadas dende o inicio do servizo ata as 15:00:

Liñas 6, 7, C5, C6, P1, P2 e P3

A partir das 15:00, estas liñas tamén terán horario de domingos e festivos.

Por outra banda, a #LiñaC11 terá unha frecuencia de 15-20 min. a partir das 10:00 e ata as 15:30.

- Domingo 9

O domingo 9 de decembro só será reforzada a #LiñaC11 do mesmo xeito en que o fará o sábado: con pasos de 15-20 min. entre as 10:00 e as 15:30.

As restantes liñas terán o domingo horario de domingos e festivos.

#Liña6, #Liña 7 e #ServizoLanzadeira para o concerto de @ricky_martin no #MontedoGozo

Este sábado 18 de agosto Ricky Martin ofrecerá un concerto na cidade. A cita terá lugar ás 22:00 no Monte do Gozo, aínda que a apertura de portas comezará a partir das 20:00.

Ante o gran número de xente que se prevé que acuda ao evento, TUSSA porá a disposición d@s asistentes ao concerto un #ServizoLanzadeira, que complementará á #Liña6 e a #Liña7:

#ServizoLanzadeira (IDA e VOLTA)

• IDA: os datos que aporta TUSSA son que este servizo funcionará entre as 16:00 e 22:00, pero descoñecemos cantos buses o formarán, polo que tampouco sabemos a frecuencia de paso. O punto de orixe será o carril bus do Hórreo (diante da escalinata da est. de trens) e o de destino será a rotonda na que conflúen a rúa das Estrelas con Agra dos Campos. En teoría, o/os bus/buses que estean a facer esta ruta farano de xeito continuado, é dicir, irán ata o Monte do Gozo con pasaxeir@s e volverán baleiros, de xeito continuado sen parar.

Punto de saída do #ServizoLanzadeira cara o Monte do Gozo

• VOLTA: tras a finalización do concerto, o #ServizoLanzadeira funcionará dende as 00:00 ata as 2:30. O punto de saída será de novo a rotonda da rúa das Estrelas con Agra dos Campos, e o de destino a rúa do Hórreo (diante do Parlamento). Unha puntualización: se se desaloxa o recinto antes das 2:30, as lanzadeiras deixarán de funcionar. Desta vez ampliouse o horario (tendo en conta que o concerto rematará sobre as 00:30/1:00), feito que aplaudimos despois do vivido no #SondoCamiño...

Punto de saída do #ServizoLanzadeira ao remate do concerto

#Liña6 (só IDA)

Haberá que coller o bus en dirección San Marcos. A parada máis próxima ao Monte do Gozo é a #Parada204, Costa de San Marcos, fronte ao hotel Santiago Apóstol.

#Liña7 (só IDA)
Liña dirección Aríns e baixarse na #Parada320, na rotonda da rúa das Estrelas con Agra dos Campos (o punto de destino do #ServizoLanzadeira tamén).

Tarifas
As tarifas serán as habituais do transporte urbano. Podes consultalas aquí.

Fonte de información: TUSSA

Doce liñas nocturnas para o #Apóstolo2018 e reforzos para o día 25

Chegan as festas do #Apóstolo2018 e con elas 12 liñas nocturnas do transporte urbano que o Concello e TUSSA poñen a disposición dos usuarios e usuarias «co obxectivo de facilitarlle á poboación da zona rural a participación en todas as actividades programadas para as festas». Asemade, o día 25  de xullo, veranse reforzadas a #Liña1 (pola mañá) e a #Liña6 (durante todo o día).

Como xa indicaba hai uns días a concelleira de Acción Cultural Branca Novoneyra, este ano se porán en marcha servizos de transporte urbano nocturnos durante a celebración das festas do #Apóstolo2018. Isto é posible grazas a que esta foi unha das ideas gañadoras dos orzamentos participativos #CompostelaDecide do anterior ano. O pasado mes de maio, durante as festas da #Ascensión2018, levouse a cabo un plan piloto, que agora se repetirá en todas as noites comprendidas entre os días 21 e 31 de xullo (incluída a que vai do 31 de xullo ao 1 de agosto). A concelleira indicou tamén a súa vontade de afianzar estas liñas nocturnas para todas as festas (entendemos que só se refire ao Apóstolo e á Ascensión...). Simplemente destacar como curiosidade que durante o dispositivo da Ascensión, as liñas funcionaron de 00:00 a 4:00 cada hora, e desta vez só o faran ata as 3:00... Non entendemos por que, cando despois das 3:00 non volve a haber transporte ata máis alá das 6:00.

Imos ao importante: as 12 liñas que recorrerán a cidade nas noites do Apóstolo. Aínda que se manteñan as denominacións orixinais para causar as mínimas confusións posibles, hai que dicir que non todas as liñas manteñen os seus perocorridos habituais.


#LIÑA1
Rosalía de Castro >> Son >> Cemiterio Boisaca

Percorrido habitual da #Liña1, só que en vez de comezar no Hosp. Clínico, farao na avda. Rosalía de Castro nº 87 (no cruce ca avda. Romero Donallo). Tamén, antes de chegar ao cemiterio de Boisaca, o autobús fará prolongación a #Son. Non estará habilitado o servizo de volta (Boisaca >> Rosalía de Castro).

Rosalía de Castro >> Son >> Boisaca: 00:00, 1:00, 2:00, 3:00.

#LIÑA4
As Cancelas <> Casas Novas <> Romaño

Percorrido habitual da #Liña4, que en sentido #Romaño fará prolongación por #CasasNovas. Funcionarán tanto o servizo de ida coma o de volta, só que en dirección #AsCancelas NON se fará prolongación por Casas Novas.

As Cancelas >> Casas Novas >> Romaño: 00:30, 1:30, 2:30, 3:30.
Romaño >> As Cancelas: 00:00, 1:00, 2:00, 3:00.

#LIÑA5
República Arxentina >> Vite
Est. autobuses >> A Rocha Vella

A #Liña5 estará dividida en dous servizos: un dende a parada Rep. Arxentina nº 43 (cruce con Romero Donallo) ata #Vite e outro dende a est. de autobuses ata #ARochaVella. Ambos os dous farán o percorrido habitual da #Liña5.

Rep. Arxentina >> Vite: 00:00, 1:00, 2:00, 3:00 (a volta dende Vite farase sen pasaxeiros).
Est. de autobuses >> Conxo >> A Rocha Vella: 00:00, 1:00, 2:00, 3:00 (o traxecto inverso farase sen pasaxeiros).

Clic para ampliar imaxe

#LIÑA6
Hórreo >> Amio >> San Marcos >> Bando >> Vilamaior
San Caetano >> Os Tilos

A #Liña6 tamén estará dividida en dous servizos: un partirá da parada do Hórreo (est. de trens) e irá ata #SanMarcos facendo a prolongación por #Amio para longo dirixirse ata #Bando e #Vilamaior; o outro sairá de #SanCaetano (parada 552) ata #OsTilos. Ambos os dous farán o percorrido habitual da #Liña6.

Hórreo >> Amio >> S. Marcos >> Bando >> Vilamaior: 00:00, 1:00, 2:00, 3:00 (a volta realizarase sen pasaxeiros).
S. Caetano >> Os Tilos: 00:00, 1:00, 2:00, 3:00 (o regreso a S. Caetano farase sen pasaxeiros).

Clic para ampliar imaxe

#LIÑA7
Valle Inclán >> Sar >> Fornás >> Aríns

Percorrido habitual da #Liña7, con prolongación a #Fornás incluída. O regreso dende Aríns farase sen pasaxeiros.

Valle Inclán >> Sar >> Fornás >> Aríns: 00:00, 1:00, 2:00, 3:00.

Clic para ampliar imaxe

#LIÑA8
Tanatorio <> Vidán

A #Liña8 estará operativa nos dous sentidos, sendo as súas cabeceiras as habituais.

Tanatorio >> Camiño dos Vilares >> Vidán: 00:30, 1:30, 2:30, 3:30.
Vidán >> Camiño dos Vilares >> Tanatorio: 00:00, 1:00, 2:00, 3:00.

Clic para ampliar imaxe

#LIÑAC11

Circ. de Fontiñas

Percorrido habitual da #LiñaC11, só que en vez de comezar na avda. do Camiño Francés (diante do C. C. As Cancelas) farao en #BernardoBarreiro (diante do IES de Sar). Tamén fara prolongación ata o #Multiusos Fontes do Sar. Ao ser un circular, calqueira persoa poderá subirse en calqueira punto do percorrido.

Bernardo Barreiro >> X. Pardiñas >> pza. Galicia >> S. Pedro >> Fontiñas >> Multiusos >> Camiño Francés >> Fontiñas >> avda. Lugo >> Bernardo Barreiro: 00:00, 1:00, 2:00, 3:00.

Clic para ampliar imaxe

#LIÑAP1
Est. autobuses >> Folgoso

Idéntica á #LiñaP1 diurna, co mesmo recorrido e cabeceiras. A viaxe de volta (Folgoso >> est. autobuses) farase fóra de servizo, sen pasaxeiros.

Est. autobuses >> Figueiras >> Folgoso: 00:00, 1:00, 2:00, 3:00.

Clic para ampliar imaxe

#LIÑAP2
Est. autobuses >> Ortoño

Tamén percorrido e cabeceiras habituais da liña. Dará servizo tamén á zona da #Choupana (no lugar da L1). Traxecto Ortoño >> est. autobuses farase sen pasaxeiros.

Est. autobuses >> Choupana >> Laraño >> Ortoño: 00:00, 1:00, 2:00, 3:00.

Clic para ampliar imaxe

#LIÑAP3
Valle Inclán >> Lamas de Abade >> A Susana

Cabeceiras habituais da liña P3, e recorrido habitual tamén pero con prolongación a #LamasdeAbade (concretamente, ao IES Lamas de Abade e ao CIFP Compostela). Traxecto A Susana >> Valle Inclán farase fóra de servizo, regresando o autobús valeiro.

Valle Inclán >> Lamas de Abade >> Sta. Lucía >> A Susana: 00:00, 1:00, 2:00, 3:00.

Clic para ampliar imaxe

#LIÑAP7
V. da Cerca >> Pardaces >> A Peregrina >> Grixoa

Percorrido habitual da #LiñaP7 ata #Grixoa pero pasando por #Pardaces. Ollo: o bus sae da #Parada660 Virxe da Cerca (Praza de Abastos 1, antes da escalinata); non confundir ca que está despois das escaleiras. A zona de #Miramontes queda sen servizo de transporte. Percorrido de volta á cidade co bus baleiro.

Virxe da Cerca >> Pardaces >> A Peregrina >> Grixoa: 00:00, 1:00, 2:00, 3:00.

#LIÑAP8
Valle Inclán >> Roxos >> Reborido

Percorrido habitual da #Liña P8, que en vez de pasar por #Roxos no traxecto de volta, farao xa no de ida (porque á volta o bus volve baleiro a Santiago).

Valle Inclán >> Roxos >> Villestro >> Reborido: 00:00, 1:00, 2:00, 3:00.

Clic para ampliar imaxe

Para os que se retiren máis tarde...

Recordar que existen dous servizos «madrugadores» todos os días da semana (incluídos domingos e festivos):

• Costa de San Marcos (hotel Santiago Apóstol) >> #Castiñeiriño ás 6:00. Percorrido habitual da #Liña6.
• #Castiñeiriño (El Corte Inglés) >> #Vite (ata onde remata a #Liña5) ás 6:20. Aínda que este servizo oficialmente estea integrado na L6, cambia o seu percorrido: é o habitual da liña ata Amor Ruibal, logo Romero Donallo >> Rosalía de Castro >> Xoán Carlos I >> Senra >> pza. de Galicia (ferraxería) >> Virxe da Cerca >> San Roque >> Pastoriza >> est. autobuses >> avda. Castelao >> Vite.

De luns a venres laborables, tamén hai posibilidade de coller:

• O primeiro servizo da #Liña1, que sae do #HospitalClínico ás 6:30.
• As #LiñaC2 e #LiñaC4, que saen ambos os dous ás 6:30 da est. de autobuses.
• A #Liña4, con saídas dende ambas cabeceiras ás 7:00.

E o día 25...

O día 25 de xullo haberá reforzos en dúas liñas (o resto terán horarios de domingos e festivos):

• #Liña1: funcionará cada 20' de 8:00 a 15:00, prolongándose dentro deste horario ata o #RecintoFeiraldeAmio todas as viaxes dirección #Boisaca. A partir das 15:00, rexirá o horario de domingos e festivos de verán (cada 30').
• #Liña6: funcionará coma os domingos e festivos da tempada de inverno, é dicir, cada 30'. Saídas de #SanMarcos: de 7:30 a 23:00 (cada 30'); saídas de #OsTilos: de 7:15 a 22:45 (cada 30' tamén).

Dende o noso punto de vista, aplaudimos a iniciativa do #BusNocturno, moi necesaria en Santiago e demandada dende fai anos. Resulta un pouco paradoxal que tivera que levarse a cabo a través dos orzamentos participativos, pero de todos modos alegrámonos da intención do Concello de mantela para todas as festas.

A modo de apunte, gustaríanos destacar que estaría ben que houbese viaxe de volta nalgunhas liñas máis (a parte da 4 e da 8), xa que nestas datas hai persoas que poden traballar durante a noite, ou mesmo persoas ás que lle gustaría achegarse á festa máis alá da hora á que rematan os servizos de transporte diurnos, e que se ven obrigadas a ir andando ou en taxi. Esperemos que o sistema vaia evolucionando, e que tal vez algún día poidamos ter estas viaxes nocturnas ata horas máis próximas ao amencer (aínda que desta vez todo o contrario, xa que se recortou nunha hora o servizo).

FELICES FESTAS!

Fontes de información: TUSSA e Concello de Santiago de Compostela

Gráficas: Bus Compostela