O Concello acometerá modificacións puntuais na mobilidade da cidade de cara ao Xacobeo 2021

O Concello publicou o pasado mes o Documento sobre actuacións urxentes no entorno da catedral de Santiago e nas zonas anexas da Cidade Histórica para o ano 2021. Neste manual recóllense unha serie de actuacións básicas que o Goberno local considera imprescindibles de cara ao vindeiro Ano Xacobeo. Trátanse de intervencións menores, de custo non moi elevado, pero necesarias para asegurar o fluxo adecuado dos turistas e visitantes para tentar compatibilizalo co día a día da veciñanza.

No tocante á mobilidade e ao transporte público cítanse algunhas cuestións que ben merecen ser mencionadas neste post: modificacións nas paradas de bus da praza de Galicia, reparto de mercadorías a cargo de TUSSA, relocalización dos trens turísticos e cambios nas liñas por mor da futura reurbanización da rúa dos Concheiros.

Praza de Galicia máis adecuada ás persoas
Xa quedou máis que demostrado durante os últimos anos e no 2021 será peor: a beirarrúa da praza de Galicia non é ancha dabondo como para acoller a todos os viaxeiros que agardan polo bus urbano (alí paran as liñas 5, 6, 7, 12, 13, 15, C5, P3, P4 e P6) mais o do aeroporto. A situación agrávase no verán e por este motivo as decisións que o Concello levará a cabo serán:

➣ O traslado da actual cabeceira da liña de bus ao aeroporto á isleta paralela á rúa da Senra. Dotarase ao espazo do mobiliario urbano preciso para facer efectivo o cambio, é dicir, de marquesiña e un panel de información en tempo real, segundo o Concello. Aínda que polo de agora, lembramos, os buses ao aeroporto de Freire non contan con SAE pero, como xa adiantamos hai meses, é probable que a súa xestión sexa asumida directamente por Raxoi para incorporalos ao transporte urbano.

Futura localización da parada do bus ao aeroporto.

➣ Ampliación das beirarrúas e mellora da accesibilidade nos pasos de peóns. Tanto a beirarrúa da parada 409 (ferretería) como a da 410 (Massimo Dutti) serán prolongadas e os bordos e o firme de baldosas de cemento serán substituídos por bordos e lousas de granito. Esta é a oportunidade idónea para instalar nunha das paradas máis empregadas de toda a rede o pavimento podotáctil, necesario para as persoas con algunha discapacidade visual e practicamente inexistente en Compostela.

É escaso o número de paradas nas que está
instalado o pavimento podotáctil.

➣ Reforma dos pasos de peóns. Actualmente non son accesibles ao cen por cento. Contan cunha pequena rampla —con demasiada inclinación— que facilita a labor aos usuarios de cadeiras de rodas, mais na práctica non é útil. Por este motivo, o Concello propón accesibilizalos segundo a fórmula do coxín berlinés, é dicir, elevándoos para buscar a comodidade do peón ao non haber elevacións e, de paso, facer reducir a velocidade ao tráfico rodado. 

Aínda que as intencións —facilitar o tránsito do transporte público e o peonil— sexan boas, coidamos que a localización escollida para a nova parada non é a máis axeitada. Ao perder os vehículos ese carril de entrada ao parking, colapsado habitualmente en verán, o taponamento será maior e terá lugar en medio e medio da praza, en vez de nese carril concreto. Deste xeito, pódese ver interrompido o tráfico procedente tanto da Senra como de Virxe da Cerca ao non poder circular por mor do atasco que terá lugar nos carrís de paso da praza. En definitiva, que se non se acompaña a medida dun plan de redución do tráfico no centro da cidade, o remedio pode ser peor ca enfermidade.

Por non comentar o feito de que nun contexto de atasco, o bus do aeroporto non podería efectuar a saída desde a nova parada ao estar a zona colapsada polos turismos que tratan de acceder ao aparcadoiro subterráneo.

Reparto de mercadorías no Casco Antigo
O estado do pavimento da zona histórica está esnaquizado, así como diversas fontes do recinto do intramuros, por mor do paso de grandes camións de carga e descarga. Neste sentido, o Concello expón establecer unha ou varias zonas na fronteira da améndoa nas que realizar as descargas, que logo serían entregadas ao destinatario final mediante pequenos vehículos eléctricos, ben a través de TUSSA ou mediante unha empresa externa. Esta medida iría acompañada dunha redución no horario de CeD, que se estende ata as 10:30 h nalgunha zona.

Trens turísticos fóra do Obradoiro

O dos trens turísticos é outro dos sen sentidos vixente na actualidade: en verán, un tren de tres vagóns (os da ruta monumental) percorre cada media hora a rúa de San Francisco ata chegar ao Obradoiro, ao que se suma outro máis nalgunhas horas puntuais (o da ruta dos parques). Agora o Concello quere limitar o itinerario desta atracción turística ata a dársena de Xoán XXIII ou «outra localización máis axeitada». Xa era hora.

As [ansiadas] obras de reurbanización en Concheiros
Este ano darán comezo as tan demandadas obras de reurbanización da rúa dos Concheiros. Desde que se semipeonalizou San Pedro en 2013, só discorre por estas dúas rúas a #LiñaC11, que se verá desviada mentres duren os traballos. No documento indícase nun par de parágrafos que os percorridos alternativos (previsiblemente por San Roque, Pastoriza, Anxo Casal e Rodríguez de Viguri) suporán un sobrecusto para Tralusa que «deberá recibir a correspondente contía compensatoria».

Supoñemos que, como xa se ten feito noutras ocasións, non se reforzará o servizo da #LiñaC11 cun bus máis durante o desvío. Porén, o non facelo implicará non cumprir a frecuencia de 12 min establecida para a ruta, que non descartamos que sexa ampliada a 15. Xorden tamén dúbidas sobre o encaixe que terán estas obras no novo mapa de liñas que se pretende licitar no primeiro trimestre deste 2020.

Como curiosidade, lemos onte en La Voz de Galicia as alteracións no tráfico previstas de cara ás obras na avenida de Lugo, á altura da rotonda dos Concheiros, executadas pola Xunta dentro do plan de mellora das entradas do Camiño na cidade. Quedamos á agarda do que comunique o Pazo de Raxoi, pero parece ser que as liñas que pasen pola zona (L6, 9, 13, C2, C4, C5, C6 e C11) van ter que verse desviadas mentres duren os traballos.

Fontes:
Concello de Santiago
La Voz de Galicia
Google Maps

O Concello limpa o panel da #Parada589, en Santiago de Chile

O antes e o despois.

No marco da campaña de mantemento e reparacións de pavimentos, o Concello reasfaltou en agosto parte da rúa Santiago de Chile, co conseguinte repintado da sinalización horizontal das dúas paradas do bus urbano desta vía, a 589 e a 590, que dan servizo ás liñas 15 e C2. Xa expresamos en Twitter a nosa insatisfacción —que non descontento— polo resultado final, posto que se optou polo método «menos visual» aínda que, obviamente, legal e válido segundo a DXT.

Concretamente utilizáronse liñas descontinuas amarelas, en vez do tradicional zigzag a miúdo empregado nas paradas do bus, moitas veces acompañado da palabra «BUS». Cremos que para os condutores de vehículos privados é menos intuitivo no sentido en que ao ver as descontinuas (indican textualmente «estacionamento prohibido ou suxeito a algunha restrición temporal»), terá que consultar o sinal que delimita o espazo reservado ao autobús para completar o seu significado. Pola contra, co zigzag enténdese á primeira a mensaxe: nese lugar está prohibido estacionar ou parar. Este método xa se empregou no reasfaltado da Poza Real, aló por marzo.

Aínda así, a mellor solución para estas dúas paradas sería a extensión das beirarrúas ata a estrada, especialmente na parada do cruce coa rúa da Rosa, na que espazo é xa pequeno de por si, e aínda por riba hai un contedor situado nun dos extremos.

A novidade atopámola no poste informativo da #Parada589, un dos que se atopaba en peor estado de toda a rede, ateigado de todo tipo de pegatinas e abandonado durante anos por gobernos locais de todas as cores. Para a nosa sorpresa, nos últimos días déuselle un lavado de cara e xa volve lucir como sempre debeu facelo. Tampouco estaría de máis, por estúpido que poida soar, indicar de algún modo a prohibición de pegar adhesivos neles porque xa volve haber un e é probable que podamos volver ás andadas.



Coidamos e esperamos que esta sexa unha tendencia a seguir noutros postes da rede de paradas, en trazos xerais moi deteriorados polo paso dos anos. Nalgúns casos esta sucidade impide ver a información sobre liñas e horarios, perdendo así este elemento a única función que debe cumprir.

Comparativa: Compostela vs.
A Coruña, xulguen vostedes...

Outra das cuestións a ter en conta de cara á vindeira concesión é o xeito de reflectir a información nos postes. A diferenza do que acontece coas marquesiñas, nos monólitos só están as liñas que pasan por esa parada, cos seus horarios e percorrido aproximado. Nós cremos que debe facerse así, posto que exhibir as 22 liñas no plano non fai máis que confundir ao usuario. Porén, hai formas e formas de expoñer os horarios das rutas. O primeiro e máis fundamental pasaría por elaborar un termómetro para cada liña, isto é, un esquema no que estiveran todas as paradas cos seus correspondentes códigos e transbordos, en vez de simples rúas como se mostran na actualidade.

É certo que o noso sistema de transporte urbano non é tan homoxéneo como o doutras cidades como A Coruña, senón que conta con numerosas liñas que á súa vez teñen diferentes cabeceiras e/ou percorridos dependendo do momento do día. Pero como diría o amigo, xa está todo inventado: en Vigo, Vitrasa, cunha complexa rede de máis de corenta liñas con numerosos itinerarios que incluso varían en verán coa extensión do servizo ás praias, a información móstrase nas paradas dun xeito claro e entendible para o usuario.

En definitiva, moito queda por facer en Compostela, tanto como a dimensión das expectativas ante o novo concurso do transporte urbano😁

Fontes de información:
@Osantodoscroqu1
Concello de Santiago
Imaxes:
Bus Compostela
DXT
Atlántico

Camiño á lexislatura da mobilidade: as propostas dos partidos

Se hai uns días resumiamos as medidas impulsadas nesta lexislatura en prol dunha mellor mobilidade e a pasividade ante a situación do transporte público, hoxe examinaremos polo miúdo as propostas dos partidos candidatos a alcaldía de cara ao 26-M. Esta pequena análise é froito do contido dos propios programas electorais, así como das declaracións dos seus candidatos e candidatas en debates e entrevistas nos medios de comunicación. Os sete aspirantes a alcaldía son: CA, PP, PSdeG-PSOE, BNG, Cs, CxG e VOX (deste último non atopamos información relativa ao tema que nos incumbe).

Compostela Aberta (CA)

Fragmento de O Viso, o xornal de CA.

O partido do candidato á reelección, Martiño Noriega, avoga por manter a liña destes catro últimos anos, priorizando sempre as mobilidades peonil e ciclista xunto co transporte público fronte ao vehículo privado. As medidas máis destacadas do programa pasan por peonalizar e humanizar rúas e reducir a presión do tráfico a través de plans de calmado como o que xa se implementou no Ensanche. Tamén contempla a redacción dun Plan de Mobilidade a nivel metropolitano que analice os desprazamentos da cidadanía e consiga reducir o uso do vehículo privado.

En relación ao transporte público, a liña estratéxica 6 di textualmente: «Mellorar o transporte público e promover o seu uso, tanto o autobús urbano coma
o metropolitano, cun servizo eficiente como medida alternativa ao automóbil». Como exemplos, cítase a introdución de rutas a demanda con microbuses para o rural (contempladas xa no novo contrato), buses máis pequenos e con maiores frecuencias para a cidade e a ansiada instalación dun sistema de aviso de próxima parada no interior dos vehículos, ademais da mellora da información nas paradas.

Nos distintos debates, Martiño Noriega fixo fincapé en que o novo contrato do transporte urbano «xa está deseñado, coas liñas caracterizadas e nestes momentos está na Administración [na Xunta] á espera de ser lanzado». Aproveitou para salientar a boa xestión dos aparcadoiros de borde durante o mandato (a construción do da avda. de Ferrol e o aumento do uso do de Santa Marta, que chega ata o 90% da ocupación, segundo el) e o impulso de iniciativas como Colecamiños, para que a rapazada poida ir de forma segura á escola a pé. Afirmou que «o transporte metropolitano da Xunta leva fracasando anos» e que a solución pasa por outros modelos, como a fusión e a coordinación entre concellos.

Partido Popular (PP)

No ámbito da mobilidade, o programa do PP de Agustín Hernández coincide con CA na gran maioría de puntos importantes. Avoga pola urxente licitación do novo contrato do transporte urbano para poder renovar a frota. Entra algo máis en detalle, especificando que tamén se mellorará a app móbil e o resto de vías informativas ao usuario. Pretenden estender a gratuidade do bus urbano (actualmente de balde só para pensionistas) aos mozos e mozas menores de 19 anos, de igual xeito que fai a Xunta no transporte metropolitano a través da TMG «Xente Nova».

Aparcadoiros de borde nunha das cláusulas do
Contrato Capital de Agustín Hernández.

Cítase tamén a ampliación do transporte público ao rural. A aqueles lugares de escasa demanda, exponse un transporte á demanda ou a posibilidade de implantar o modelo do bus escolar compartido, en marcha en Galicia dende o ano pasado. Pretende adecuar os horarios do bus ao aeroporto ás necesidades reais dos usuarios e mesmo contemplar a posible conexión ferroviaria. Finalmente, e non por iso menos importante, o PP inclúe no seu programa a creación de carrís bus, tan necesarios nalgúns puntos da cidade, e a renovación completa das marquesiñas.

Nos debates e entrevistas, Agustín Hernández anunciou a elaboración dun novo Plan de Mobilidade e outro Plan de Aparcadoiros Disuasorios «realista, financiado e asequible», dándolle prioridade ao proxectado no Campus Sur. Tamén destacou en varias ocasións a necesidade de ampliar as peonalizacións, pero non indicou a que lugares.

Partido dos Socialistas de Galicia (PSdeG-PSOE)

O actual SAE presenta erros
nos tempos de chegada, que son
aínda peores na app. Cando indica
«Saída», poden quedar ata 5 min.

No tema que nos atinxe, o programa electoral do PSdeG-PSOE de Xosé Sánchez Bugallo é o máis completo e específico. Fala, como o resto dos partidos, do novo concurso da prestación do servizo de transporte urbano, renovando a frota para convertela en accesible e en máis respectuosa co medioambiente. Ademais, contempla tamén a renovación do SAE (Sistema de Axuda á Explotación), o sistema que nos permite saber o paso exacto do bus por cada parada, e que na actualidade deixa moito que desexar. Bugallo di comprometerse a instalar, polo menos, 40 novos postes informativos ao longo do mandato, así como a instalar o sistema de aviso de paradas no interior dos buses. 

Así mesmo, o programa fala de carrís bus e dun sistema de preferencia en cruces para as liñas de maior utilización (1, 5, 6 e C11), baixo o marco dun novo Plan de Mobilidade 2020 - 2030. Ao igual que o PP, non se especifica o lugar de implantación do carril bus, só se di que «por onde circulan a maior parte das liñas urbanas». Para o rural, transporte a demanda ou circuítos con autobuses que cubran varias parroquias á vez. É nelas onde se expón que TUSSA realice un seguimento continuado do estado de conservación das marquesiñas, limpándoas e manténdoas en bo estado. 

Nos debates, Xosé S. Bugallo defendeu a creación dun Consorcio Metropolitano de Transportes, no que participarían os Concellos e a Xunta para coordinar o transporte metropolitano. Neste aspecto, prevé crear unha liña de bus Brión - Polígono do Tambre que dea servizo a todas as localidades intermedias e extensible ata Sigüeiro. No bus do aeroporto, avoga pola supresión de paradas e o aumento de frecuencias para reducir o tempo de viaxe.

Servizo de aluguer de bicis que Bugallo impulsou
na súa última lexislatura.

Nos debates, Bugallo insistiu na urxente renovación da frota de autobuses de «14 anos de antigüidade», así como na creación de diversos aparcadoiros de borde (Cruceiro da Coruña, San Lázaro, Castiñeiriño, A Rocha e Hospital Clínico) conectados eficientemente a través do bus urbano. No mundo ciclista, aposta por seguir impulsando unha mellor convivencia entre coche e bici así como recuperar o servizo de aluguer de bicicletas.

Bloque Nacionalista Galego (BNG)

Na actualidade só hai servizo de bus nocturno
durante as festas da Ascensión e o Apóstolo.

O partido de Goretti Sanmartín propón medidas que ningún outro partido contempla no seu programa, pero non por iso menos necesarias. En primeiro lugar, a creación dun servizo de buses nocturno durante todas as noites da semana e con horarios especiais os fins de semana e festivos que conecte o centro coa periferia. O programa fala tamén de «dar prioridade ao autobús urbano e comarcal» a través da mellora de frecuencias, e mesmo de estudar a viabilidade da conexión ferroviaria con municipios veciños como Bertamiráns.

Mapa metrominuto de Pontevedra, modelo que o BNG
pretende instaurar en Compostela.

O BNG avoga pola creación de intercambiadores de transporte nos parkings de borde, que deben ampliarse. Para os ciclistas, proponse a creación de carrís bici nas entradas do Camiño na cidade e interurbanos con localidades veciñas, como o que demanda Composcleta co Milladoiro. E para os peóns, a creación dun mapa metrominuto, como o de Pontevedra, para saber cal é a distancia e tempo de percorrido a pé dun lugar a outro con facilidade. O BNG é o único que partido que fai referencia á adecuación das paradas dos vehículos de transporte público, xa que non é posible acadar a accesibilidade universal só cos vehículos accesibles; as paradas tamén teñen que selo.

Nos medios de comunicación, Goretti Sanmartín insistiu na idea básica de que para a mobilidade en Compostela debe priorizarse, de maior a menor rango, do seguinte xeito: peón, bicicleta, transporte público, vehículo privado. Fixo fincapé nas escasas frecuencias horarias do bus durante as fins de semana (case inexistentes no rural) e na necesidade do bus nocturno nunha cidade universitaria. Para rematar, recalcou a necesidade de construír dous aparcadoiros o antes posible: o do Campus Sur para dar servizo ao pequeno comercio do Ensanche e o de Belvís, para a Praza de Abastos.

Ciudadanos (Cs)
A candidata de Cs Santiago, María Vilas, aspira a entrar na corporación con nada  máis e nada menos que tres que concelleiros, tal e como lle contou o outro día na Ser a Luís Pardo. A pesar de non ser tratada a mobilidade nas súas entrevistas e de non ter participado nos debates co resto de candidatos, o programa de Ciudadanos si conta con algúns puntos destacables.

A tecnoloxía NFC permite pagar o autobús co móbil.
Ciudadanos quere implantar en Santiago este método
de pago.

No relativo ao transporte público, como o resto dos grupos, propón a reordenación das liñas e o aumento de frecuencias, así como a extensión do bus ao rural. Para lograr a maior efectividade posible nesta remodelación, defenden o uso do Big Data neste aspecto, que sen dúbida é o mellor xeito de coñecer as rutinas e o xeito de moverse da cidadanía. De feito, dende finais do ano pasado, a EMT de Madrid comezou a usar o Big Data de Moovit para tentar mellorar os seus servizos. 

Queren modernizar a frota de buses en aras de electrificala, pero a proposta soa utópica, xa que habería que establecer en polo menos, unha das cabeceiras de cada liña, un punto de recarga. Iso si, pretenden mellorar a velocidade media na rede a través de prioridade semafórica. Todo isto iría complementado cunha app móbil que, a parte de para consultar os percorridos e paradas, serviría para abonar os billetes e bonos!

Compromiso por Galicia (CxG)
O partido liderado por Xoán Bascuas é o único que, máis aló de manifestar o seu desexo de remodelar as liñas de autobús, é un pouco máis concreto: especifican que o actual sistema radial debe ser substituído por un con dous intercambiadores que, unidos á Intermodal, serán conectados entre si a través de só dúas liñas. Destes intercambiadores partirán as liñas cara os diferentes barrios, así como algúns circulares de longo percorrido (supoñemos que similares aos actuais C2 e C4). 

Sistema de aviso de próxima parada nun bus
urbano da Coruña.

Falan tamén da necesidade da instalación dun sistema de aviso acústico e visual de cada parada no interior dos buses. Chama a atención que sexa o único grupo político que nomee a inexistencia en España dunha Lei de Financiamento do Transporte Urbano. Aínda que aseguren instar ao Goberno para a súa elaboración —moi improbable—, nós, polo menos, temos en conta o detalle e a vontade.

Conclusións
Se aínda quedaba algunha dúbida, tras a campaña electoral confirmouse que o vindeiro mandato será o da mobilidade. Todos os partidos coinciden na remodelación das liñas e da necesidade de que cheguen ao rural, así como na construción de máis aparcadoiros de borde. Agora ben, hai outras cuestións que só algúns deles, simplemente, nomean e que non deixa de ser preocupante, como por exemplo a accesibilización de paradas (BNG), o sistema de aviso sonoro e acústico (CA, PSdeG-PSOE e CxG), o uso do Big Data (Cs) ou a renovación do SAE (PSdeG-PSOE).

Fontes de información:
Compostela Aberta (programa electoral)
Populares de Santiago (programa electoral)
PSdeG-PSOE Santiago (programa electoral)
BNG Compostela (programa electoral)
Ciudadanos Santiago (programa electoral)
Compromiso por Galicia Santiago (programa electoral)
Compromiso por Galicia (propostas)
Xeoportal Concello de Santiago
Cadena SER (debate infraestruturas)
Diario de Madrid
La Voz de Galicia (debate electoral)
Correo TV (debate electoral)

Servizos extra para a Cidade Imaxinaria e o concerto de Bob Dylan

Con motivo da celebración da Cidade Imaxinaria Primavera na Cidade da Cultura o vindeiro sábado 27 e o concerto de Bob Dylan no Multiusos o luns 29, TUSSA ofrecerá dous servizos especiais durante os dous días para facilitar o acceso aos recintos dende o centro da cidade.

> Sábado 27: Cidade Imaxinaria

Regresa, un ano máis, a Cidade Imaxinaria á Cidade da Cultura. Terá lugar o sábado 27 de abril a partir das 17:00. Como a #Liña9 non funciona os sábados pola tarde, as opcións para subir ata o Gaiás en transporte público serán as seguintes:

➢ #ServizoEspecial: será un autobús que funcionará entre a pza. de Galicia (#Parada410, diante do Massimo Dutti) e a CdC cunha frecuencia de 40 min. A primeira saída dende o Gaiás será ás 14:00 e a última ás 21:20. Dende o Ensanche, o primeiro bus partirá ás 14:20 e o último ás 21:00. Dende a pza. de Galicia, este bus seguirá por Virxe da Cerca seguindo o itinerario da #Liña9, coa única excepción de que non accederá ao Multiusos de Sar na viaxe de ida nin na de volta. As tarifas serán as habituais.

Os horarios detallados son: saídas dende a Cidade da Cultura: 14:00, 14:40, 15:20, 16:00, 16:40, 17:20, 18:00, 18:40, 19:20, 20:00, 20:40, 21:20.
Dende a praza de Galicia: 14:20, 15:00, 15:40, 16:20, 17:00, 17:40, 18:20, 19:00, 19:40, 20:20, 21:00.

➢ #LiñaC11: aínda que o lóxico e o máis practico sería acceder a través do servizo habilitado para a ocasión, a #LiñaC11 conta con tres prolongacións á Cidade da Cultura os sábados tarde, que eles mesmos recomendan na web aínda que os horarios sexan erróneos. Os servizos desta liña con paso por Xeneral Pardiñas ás 17:30, 19:45 e 20:00 subirán ata o Gaiás.

> Luns 29: concerto de Bob Dylan

O luns 29 de abril ás 21:00 Bob Dylan ofrecerá no Multiusos Fontes de Sar o que será o único concerto en Galicia da súa última xira. Ante a escaseza de servizos de transporte ordinarios ata o recinto, TUSSA porá en marcha o habitual #ServizoLanzadeira que se emprega para os eventos no Multiusos. Deste xeito, poderase acceder a través:

Punto de saída do #ServizoLanzadeira.

➢ Do #ServizoLanzadeira: de xeito continuado (isto é, que sempre haberá un bus ao que subirse) dende as 17:00 ata as 21:00. Sairá dende o carril bus do Hórreo, onde comeza a escalinata que baixa á estación de trens. Irá directo ata o Multiusos, sen facer paradas. Manterase en sentido inverso ao remate do concerto, a partir das 22:45.

➢ Da #LiñaC11 (cada 12 min): todos os servizos comprendidos entre as 17:00 e as 21:00 prolongaranse ata o Multiusos. Non sabemos se se reforzará a liña cun autobús máis, pero dende logo cremos que sería o máis conveniente tendo en conta o percorrido extra nun día laborable (hai máis tráfico que durante as fins de semana). No centro, discorre por Xeneral Pardiñas e pza. de Galicia.

➢ Da #Liña9 (cada hora): no seu percorrido habitual accede ao Multiusos. Sae ás XX:30 de Casas Novas e sobre as XX:40 para na Senra. Logo continúa por Virxe da Cerca, Pastoriza, Anxo Casal, Rodríguez de Viguri e Fontiñas.

➢ Das #LiñaC5 e #LiñaC6 (cada hora): unicamente as recomendamos para acceder dende zonas periféricas da cidade que non queden cubertas por algunha das outras alternativas, xa que teñen pouca frecuencia e son moi habituais os retrasos.

Fontes de información:
Cidade da Cultura
TUSSA (I) e TUSSA (II)
Imaxes:
Cidade da Cultura
Ticketmaster
Google Maps

Os desfiles do Entroido alteran os buses en Santiago e Bertamiráns

O luns 4 de marzo en Bertamiráns (concello de Ames) e o martes 4 en Compostela, o transporte público sufrirá retencións e desvíos por mor dos desfiles de Entroido que terán lugar nas dúas localidades. Ademais, en Santiago tamén se verán desviadas as #Liña5 e #LiñaC4, ao quedar cortada ao tráfico a avda. de Ferrol, punto onde se concentrarán as carrozas.

LUNS 4 DE MARZO, DESFILE EN BERTAMIRÁNS

➢ A partir do luns 4 (ás 00:00) e ata as 12:00 do martes 5, queda prohibido estacionar no aparcadoiro da Telleira (preto da piscina homónima), que será o lugar onde se concentren as carrozas.

➢ Luns 4 de 14:00 a 20:00: prohibido estacionar nas rúas que rodean ao aparcadoiro (travesía do Lodeiro, avda. da Peregrina, rúa do Cómaro e a rúa sen nome que delimita polo nordés).

➢ DESFILE: está previsto que comece ás 18:00 e sairá do propio aparcadoiro da Telleira co seguinte percorrido: avda. da Peregrina (I) ➤ avda. da Maía (I) ➤ Poeta da Maía ➤ Pedregal ➤ avda. da Maía (II) ➤ avda. da Peregrina (II).

Plano explicativo do desfile de Entroido de Bertamiráns.

Transporte metropolitano

Previsiblemente, os buses metropolitanos que atravesan Bertamiráns sufrirán retrasos e retencións puntuais, ao ter que agardar ao paso do desfile para poder continuar os seus percorridos. Os viaxes máis susceptibles de verse afectados son:

• XG517, Santiago (r/ da Rosa) ⇆ cruce dos Ánxeles (operada por Monbus e Grupo Ferrín): as viaxes con saída de ambas cabeceiras ás 17:45 e 18:15.
• V-7026, Santiago (est. autobuses) ⇆ Negreira (Grupo Ferrín): as viaxes con saída de ambas cabeceiras ás 17:45.

MARTES 5 DE MARZO, DESFILE EN SANTIAGO

➢ A partir das 14:00 e ata o remate do desfile quedará prohibido aparcar en todas as rúas polas que circulará. O percorrido será o seguinte: avda. de Ferrol ➤ Romero Donallo ➤ Frei Rosendo Salvado ➤ pza. Roxa ➤ República do Salvador ➤ Hórreo ➤ Senra ➤ Xoán Carlos I. Dende aquí, continuarán por Rosalía de Castro e avda. da Coruña, para rematar no estanque do Campus Sur, onde quedarán «aparcadas» as carrozas.

A avenida de Ferrol será o punto no que se concentrarán as carrozas antes de comezar o desfile. Estará pechada ao tráfico de 16:30 a 17:30. Por este motivo, as #Liña5 e #LiñaC4 deixarán de circular pola avenida durante este horario, desviándose pola avda. de Antonio Fraguas (SC-20) e Romero Donallo, recuperando o itinerario habitual en República Arxentina.

De 16:30 a 17:30, quedarán suprimidas as #Parada085, avda. de Ferrol (pza. da Mercé); #Parada084, avda. de Ferrol nº 51 (c. Xosé Pasín); #Parada083, avda. de Ferrol nº 19 (c. Doutor Maceira).

O desfile comezará ás 17:30, e non se prevén desvíos nas liñas do #BusUrbano, senón que os autobuses agardarán a que pase a comitiva para poder continuar os seus percorridos, baixo as instruccións da Policía Local. Así, prevense retrasos e retencións puntuais en practicamente todas as liñas para a tarde do martes, entre as 17:30 e as 19:00, aproximadamente. Será unha tarde complicada para utilizar o transporte público na cidade.

Transporte metropolitano

As liñas do #BusMetropolitano que teñan cabeceira na rúa da Rosa tamén se verán afectadas, pero en menor medida. Simplemente terán que esperar a que o desfile vaia dende a avda. de Ferrol ata Frei Rosendo Salvado, para que quede Romero Donallo libre e poidan acceder ata a República Arxentina para continuar ata A Rosa.

Bo Entroido a tod@s!🎭

Fontes de información:

Concello de Ames

Concello de Santiago

#TransportePúblico en Costa Vella, unha materia pendente

Hai uns días, El Correo Gallego publicaba unhas pezas adicadas ás xa máis que coñecidas e habituais queixas sobre os problemas do transporte urbano no entorno do polígono de Costa Vella. O certo é que só dúas liñas (C5 e C6) conectan esta superficie industrial co centro da cidade, e ambas as dúas teñen frecuencia dunha hora e percorridos inmensos. É de esperar que o primeiro dos problemas se resolva coa nova licitación, pero todo parece indicar que o segundo quedará sen solventar.

Cales son os problemas?

En rasgos xerais, podemos identificar tres problemas básicos:

➢ Frecuencias escasas
De luns a venres e os sábados pola mañá, as liñas que serven ao polígono son dúas: a #LiñaC5 (saídas ás XX:30) e a #LiñaC6 (saídas ás XX:05). A teoría xa non soa ben porque practicamente estamos a falar dun bus cada media hora que, ante a demanda de viaxeiros e coa recente instalación de grandes empresas na zona, resulta insuficiente.

➢ Retrasos máis que habituais

O habitual Citaro da #LiñaC5 na
cabeceira de Eslovenia, en Costa Vella.

Se a teoría xa non soa ben, podemos augurar que a práctica é todavía peor. E é que en realidade, os horarios estipulados para estas dúas liñas son irreais e imposibles de cumprir: unha hora para percorridos circulares duns 15 km que rodean a cidade e atravesas as zonas máis conflitivas en canto á intensidade de tráfico (Virxe da Cerca, Hórreo, Doutor Teixeiro...).

Ademais, a #LiñaC6 tamén se viu afectada pola peonalización da rúa de San Pedro en 2013, polo que agora circula por San Roque → Basquiños → Pastoriza → Rodríguez de Viguri co mesmo tempo de viaxe que por aquel entón. De feito, como comenta unha usuaria no vídeo, ás veces é tan esaxerado o retraso que mesmo á liña C5 chega antes que a C6 —o que implicaría unha demora de 25 min—.

➢ Percorridos
O último dos problemas que habería que solventar é, baixo o noso punto de vista, o dos percorridos. Imos exemplificalo collendo como punto de referencia o centro da cidade:

— Centro cidade → Costa Vella: se empregamos o circular C5, a viaxe poderíanos levar ata 40 min, xa que teríamos que ir percorrendo Restollal, a rúa da Estrada, Fontiñas e Amio. No caso do C6, o tempo de traxecto sería algo máis curto, pero en todo caso próximo á media hora.

— Costa Vella → centro cidade: a opción máis «rápida» sería empregar a #LiñaC5, que, despois de percorrer Amio e Fontiñas, accede ao centro a través de Bonaval e Virxe da Cerca (sobre 25 min). No caso da C6, dende Fontiñas, habería que percorrer a rúa de Diego Bernal, a da Estrada e o Restollal ata chegar ao Hórreo (uns 30 min).

Que se contempla na nova concesión ao respecto?

Basta con botar un ollo ao Xeoportal do Concello para consultar os itinerarios das liñas da nova concesión. As substitutas das actuais rutas que conectan a cidade co polígono serán as #Liña30+ e #Liña30-, que contan cun percorrido practicamente igual que os dos circulares C5 e C6, como xa comentamos no seu día.

Visualización das futuras liñas 30+ e 30- no Xeoportal
(clic para ampliar).

Aínda que non coñecemos os horarios, supoñemos que estas novas liñas funcionarán tamén os domingos e festivos —cumprindo así unha vella demanda da veciñanza de Amio—, posto que o tramo do polígono aparece como unha prolongación.

Con todo, o problema dos itinerarios non quedaría resolto con esta nova proposta, xa que habería que dar a mesma volta para chegar á zona industrial dende o Ensanche. Agardamos polo menos que si se solucione a cuestión das frecuencias dotando a cada liña con, polo menos, dous autobuses.

Posibles solucións buscomposteleiras

Recreación da prolongación da #Liña1 polo
polígono de Costa Vella.

Unha das posibles solucións para poder acceder a Costa Vella dun xeito máis áxil e cun percorrido menor que os actuais, sería prolongar a #Liña1 dirección Boisaca, como xa se vén facendo dende hai anos para dar servizo á Feira de Amio durante a Ascensión. Con todo, sería unicamente un método de acceso, xa que para o regreso implicaría unha gran cantidade de tempo, ao ter os buses que ir ata Boisaca (de cara á nova concesión, aínda peor, ata o Tambre), facer alí regulación horaria e logo volver.

Esta prolongación non sería posible na viaxe cara o Hospital Clínico, xa que dende o carril sentido centro cidade do Cruceiro da Coruña non se pode acceder á rúa de Amio.

Fontes de información:
El Correo Gallego (08/02/2019)

El Correo Gallego (10/02/2019)

Xeoportal do Concello

TUSSA

Obras en Frei Rosendo Salvado desviarán á #Liña5 durante un mes

Dende hoxe [luns 14 de xaneiro] ás 8:30 h e ata dentro de, aproximadamente, un mes, queda pechada ao tráfico a rúa Frei Rosendo Salvado, concretamente o tramo que vai dende o cruce con Ramón Cabanillas ata a confluencia con Santiago de Chile. Por este motivo, a #Liña5 do transporte urbano verase desviada:

Tras sobrepasar a praza de Galicia, os buses da #Liña5 con dirección A Rocha / A Rocha Vella seguirán por Doutor Teixeiro ata a rúa da Rosa, en vez de xirar á dereita cara República de El Salvador. Percorrerán A Rosa enteira para enfilar Santiago de Chile. No cruce desta rúa con Frei Rosendo, incorporaranse ao seu itinerario habitual.

Durante o tempo que duren estas obras —que teñen como obxectivo a mellora da drenaxe en Frei Rosendo Salvado para evitar os grandes asolagamentos vividos nas épocas de chuvias—, quedarán anuladas dúas paradas:

🚏👎 #Parada433, República de El Salvador.

🚏👎 #Parada263, Frei Rosendo Salvado.

No seu lugar, habilitaranse outras dúas como alternativa:

🚏👍 #Parada479, rúa da Rosa.

🚏👍 #Parada589, Santiago de Chile (c. Frei Rosendo).

App e sinalización «in situ»

Así estaba sinalizada a
suspensión da #Parada263
no pasado mes de xullo.

De todos os xeitos, na app seguirán figurando como paradas de paso as anuladas e tampouco haberá rastro da #Liña5 nas alternativas. Lembra que a mellor de todas e a única que combina transporte urbano e metropolitano é Buscq.

Nas paradas físicas, coidamos que o que se fará é pegar un papel nunha das farolas próximas —xa que non hai poste informativo en ningunha das dúas suprimidas— cunha copia da información ofrecida na web de TUSSA. Coas chuvias previstas para a próxima semana, esta folla mollarase e perderase a información... A importancia dos paneis!

Fontes de información:

TUSSA

Concello de Santiago

A cabalgata dos Reis Magos provocará retrasos no transporte urbano

Como todos os anos, o próximo sábado 5 de xaneiro as SS.MM. os Reis Magos de Oriente percorrerán as rúas da cidade para tomar nota dos regalos de última hora dos máis cativos. Para poder levar a cabo a cabalgata, será necesario cortar ao tráfico algunhas rúas do Ensanche e o transporte urbano tamén se verá afectado. Imos ver a cronoloxía do evento:

14:00: hora de prohibición de aparcamento no parking da estación de tren, lugar dende onde sairá a cabalgata.

15:00: prohibición de aparcamento nas rúas que forman parte do percorrido da cabalgata: Santiago de Chile (só dende o cruce coa Rosa ata o de Frei Rosendo) >> Frei Rosendo Salvado (entre o cruce con Stgo. de Chile e a pza. Roxa) >> pza. Roxa >> República de El Salvador >> Hórreo (dende o cruce con Rep. El Salvador ata pza. de Galicia).

18:00: hora de saída da cabalgata dende a estación de trens cara o Obradoiro co seguinte itinerario:

Mentres as carrozas estean a percorrer as rúas da cidade, o Concello recomenda aos vehículos evitar o Ensanche. Aqueles que queiran atravesar a avda. de Lugo, é mellor que o fagan empregando o túnel do Hórreo. A rúa Virxe da Cerca —pola que pasan máis do 90% das liñas do transporte urbano— tamén estará pechada ata que remate o desfile, que previsiblemente chegará á pza. do Obradoiro cara ás 19:30.

Transporte urbano

TUSSA nunca prepara ningún dispositivo especial nin para a cabalgata dos Reis Magos nin para o desfile de Entroido. A única indicación oficial é que se informará das «pequenas alteracións» que poidan ter lugar durante a tarde «a través dos paneis informativos».

No entanto, e baseándonos nas experiencias doutros anos, podemos afirmar que o que previsiblemente farán os buses é esperar a que o desfile acabe de pasar pola rúa pola que van circular. É habitual nesta xornada ver longas coles de autobuses ao longo de toda a Virxe da Cerca esperando a poder pasar, cando quizais a opción máis razoable tería sido desvialos pola avda. de Lugo.

Tampouco podemos confirmar nada 100% seguros, xa que nos inquieta iso de que se vai informar a través dos paneis —non nos consta que se fixera nunca antes—. En todo caso, estaremos atentos para ver se de verdade hai unha boa planificación que redunde nunha información clara e sinxela de entender para o usuario. Aínda que de ser así e cun percorrido xa programado de antemán, tampouco entendemos por que non mostrar estas «pequenas alteracións» na web uns días antes.

A nosa recomendación persoal para o 5 de xaneiro é, en definitiva, paciencia. Adoita ser unha tarde de descontrol e desinformación e complicada para moverse en transporte urbano por Compostela. A ver se este ano, por primeira vez, TUSSA consegue que non o sexa —ou, polo menos, non tanto—.😆

Fonte de información:

Concello de Santiago

A @SanSilvestreStg causará desvíos en todas as liñas o último día do ano

Como cada ano, o vindeiro luns 31 de decembro terá lugar a San Silvestre Santiago, carreira coa que tradicionalmente despedimos o ano en Compostela. Este ano participarán arredor dunhas 2.200 persoas e a cidade adaptarase para dar cabida a este evento. Isto implicará un corte de tráfico no eixo Xoán Carlos I - Senra - Virxe da Cerca, que afectará a todas as liñas do transporte urbano. Lembra tamén que este día os autobuses adiantarán a súa hora de retirada para poder chegar á tempo a comer as doce uvas da sorte ;)

Percorrido da San Silvestre Santiago 2018

➢ 17:45: corte do tráfico no eixo Xoán Carlos I - Senra - Virxe da Cerca. Eixo alternativo: Doutor Teixeiro - avda. de Lugo.

➢ As liñas só sufrirán desvíos na zona centro da cidade. O resto dos percorridos pola periferia serán os habituais.

➢ Praza de Galicia será o punto de referencia para coller o bus urbano na zona do Ensanche:

- #Parada409 (ferretería): nela pararán todos os autobuses de todas as liñas (excepto as #LiñaC2 e a #LiñaC4) que se dirixan en dirección

#Parada409, pza. de Galicia (ferretería), na que
pararán as liñas dirección norte.

norte, coa excepción da #Liña6 cara San Marcos e os circulares C5 e C6, que pararán na outra parada da pza. de Galicia, a #Parada410. Pola súa banda, a #Liña13 non realizará ningunha parada na praza, posto que xirará dende Montero Ríos cara Doutor Teixeiro directamente.

- #Parada410 (Massimo Dutti): nela

#Parada410, pza. de Galicia (Massimo Dutti) na que
pararán as liñas no resto das direccións.

pararán os buses (exceptuando outra vez os das #LiñaC2 e #LiñaC4) que vaian en calquera outra dirección que non sexa a norte. Tamén o farán, aínda que si vaian en dirección norte, a #Liña6 cara San Marcos, a #LiñaC5 e a #LiñaC6.

Casos «especiais»

➢ #Liña6: os buses da #Liña6, en ámbolos dous sentidos de circulación (San Marcos e Os Tilos), irán polo Hórreo ata a #Parada410 (pza. de Galicia, Massimo Dutti). Polo tanto, coincidirán nesta parada os buses que se dirixan cara ambas cabeceiras; haberá que prestar atención ao panel de destino!

➢ #Liña7: rematará o percorrido na #Parada410, sen acceder a Valle Inclán. Esta será o punto de referencia para coller a liña en sentido Aríns / Fornás.

➢ #Liña13: para coller a liña en dirección norte (cara Belvís), non se poderá empregar a #Parada409 coma no resto das liñas; empregaranse as dúas de Xeneral Pardiñas. De tódolos xeitos e ante o amplo percorrido que terá que percorrer o bus desta liña en sentido X. Pardiñas, os 20 min. habituais resultarán —aínda máis— insuficientes, polo que funcionará indo e vindo de xeito continuo, tratando de adaptarse a un horario irreal.

➢ #LiñaC2 e #LiñaC4: estas dúas liñas non poderán realizar o tramo Pombal - San Clemente - Xoán Carlos I. Só quedarán suprimidas as paradas comprendidas entre eses dous puntos e o resto do percorrido será o habitual.

➢ #LiñaC5 e #LiñaC6: ámbalas dúas virán polo Hórreo e despois farán parada na #Parada410 (Massimo Dutti). Logo, a primeira seguirá o seu percorrido habitual pola rúa da Rosa e a segunda irá ata Fontiñas pola avda. de Lugo.

➢ #LiñaC11: aínda que catalogada de circular de forma oficial, o certo é que a #LiñaC11 ben podería ser dividida en dúas viaxes, e de feito así fai TUSSA para indicar os desvíos da mesma: no sentido C.C. As Cancelas - Xeneral Pardiñas o percorrido será o habitual. No inverso, os buses irán, dende a #Parada409 (pza. de Galicia, ferretería), por Doutor Teixeiro e avda. de Lugo ata Fontiñas.

Fontes de información / das imaxes:

San Silvestre Santiago
TUSSA

Google Maps