Avistado un Citaro L en probas

O pasado luns «pillamos» en Virxe da Cerca a un novo autobús en probas. Trátase dun Mercedes-Benz Citaro L, de tres portas e 15 metros de lonxitude. No seu interior ían dous condutores de Tralusa (un conducindo e outro de pé ao seu lado) e o que parecía ser un técnico asesor.

Este vehículo pertence ao Grupo Monbus (propietario de Tralusa) e tivo varios destinos. Un dos últimos foi Sabadell (Barcelona), onde cubriu un traxecto substitutivo por obras en Renfe. Chegou a Compostela en xuño para formar parte dos servizos lanzadeira para O Son do Camiño e o concerto de Alejandro Sanz, e parece que a súa estadía está a ser prolongada para poñelo a proba.

O 1817 en Sabadell.

Os seus 15 metros converteríano, no caso de que comezara a prestar servizo na cidade, no bus máis longo de toda a frota. Os vehículos máis longos ata o de agora andan en torno aos 12 m. Porén, ben sabido é que a fisionomía de Compostela non está preparada para vehículos destas dimensións. Un dos puntos máis conflitivos é a curva das Rodas:

#EstáPasando [9.30] | Lo de todas las mañanas en San Roque. Las maniobras de los autobuses en la curva de As Rodas son un espectáculo. pic.twitter.com/VoIjxN465K

— La Voz de Santiago (@vozdesantiago) 29 de xaneiro de 2019

O Citaro L nas lanzadeiras ao Monte do Gozo.

Con todo, cabe a posibilidade de que este novo autobús estivera sendo probado para destinalo á ruta do aeroporto de Lavacolla, a futura #LiñaAP que o Concello terá que xestionar a partir de decembro coa implantación do novo Plan de transporte da Xunta. Neste caso a lonxitude si estaría xustificada, xa que o percorrido deste servizo que unirá a Estación Intermodal coa terminal discorre por vías periféricas adaptadas a vehículos longos.

O 1917 en Alcalá e
en Santiago.

Guiándonos pola súa matrícula e a través de ferramentas online, podemos saber que foi matriculado en agosto de 2014, polo que este Citaro L cumprirá o lustro nos vindeiros días. Tería a honra de converterse no vehículo máis novo de Tralusa, seguido do Citaro adquirido o ano pasado, de algo máis de oito anos.

Por facer memoria...
Os últimos vehículos cen por cen novos do transporte urbano son os tres Citaro K que entraron en servizo no 2012, que son propiedade do Concello e foron cofinanciados polos Fondos FEDER da Unión Europea. Dende aquela, uníronse á frota en torno a dez vehículos procedentes de Alcalá de Henares (varios Scania CS40 City II, outros Scania N270UB e Citaros de primeira xeración). No verán de 2018 incorporouse un Citaro procedente do aeroporto de El Prat e agora, no de 2019, veremos que acontece con este pequeno gran xigante, o Citaro L.

Fotos: MiQuel Segura, El Intercambiador, asannei e elaboración propia

TUSSA trasladou a máis de 50.000 persoas a O Son do Camiño

O Concello vén de publicar as cifras oficiais correspondentes ao uso do transporte público para desprazarse ata O Son do Camiño. O número total de usuari@s foi 50.695. Destes, 45.545 (o 89,84%) empregaron os servizos lanzadeira habilitados para a ocasión e os restantes distribuíronse entre as liñas 6 e 7, cunha afluencia maior na primeira. O certo é que non acabamos de entender o sistema de medición nas liñas regulares, posto que se rexistra á persoa cando sube ao bus, pero non en que parada baixa.

O servizo lanzadeira foi prestado con vehículos de
Tralusa e con vehículos «prestados» doutras empresas.

Cifras por día
O venres e o sábado foron os días nos que máis se empregou o bus urbano. Foron entre 15.000 e 18.000 as persoas usuarias dos servizos ofertados. O xoves, o primeiro día do festival, foi o que menos tivo, uns 12.000.

Cifras por franxa horaria
Das catro franxas establecidas por TUSSA (inicio - 15:00, 15:00 - 23:00, 23:00 - 00:00 e 00:00 - fin), as máis empregadas foron, obviamente, as que máis horas abarcaban, é dicir, de 15:00 a 23:00 h  e de 00:00 ao final (en torno as 4:30 ou 5:00 h). Destaca o feito de que, aproximadamente, foi o mesmo o nº de persoas que empregaron o bus tanto para ir como para volver nas distintas xornadas.

Comparativa coa edición anterior
Non hai cifras oficiais das persoas transportadas durante a primeira edición de O Son do Camiño, en 2018. Porén, as cifras da globalidade da rede si recollen o número de persoas que empregaron os servizos especiais durante todo o ano: 50.036. Tendo en conta que no 2019 só neste festival foron 50.695, podemos concluír que o balance dos servizos extraordinarios prestados por TUSSA para determinados eventos é positivo e que está á alza.

Fonte de información: Concello de Santiago
Gráficas (cifras por día e por franxa horaria): Concello de Santiago

Dous servizos lanzadeira atenderán a demanda dos asistentes de O Son do Camiño

Esta semana arrinca por fin a segunda edición do festival O Son do Camiño no Monte do Gozo. Terá lugar durante o xoves 13, venres 14 e sábado 15 de xuño. Este ano, como novidade, TUSSA porá en marcha dous servizos lanzadeira a disposición dos asistentes: un conectará o recinto co centro da cidade e o outro co aparcadoiro que será habilitando no Recinto Feiral de Amio. Complementarán ás liñas 6 e 7, que tamén contan con paradas nas inmediacións do Monte do Gozo.

Mapa proporcionado pola organización do festival cos lugares clave. CLICA AQUÍ se non podes visualizalo correctamente.

Horarios
As dúas liñas que servirán ao festival serán:

> Liña Especial 1 (centro cidade ⇄ Monte do Gozo)
> Liña Especial 2 (Recinto Feiral de Amio ⇄ San Lázaro)

E para ambas as dúas, os horarios serán os seguintes:

> Sentida IDA: servizos cara o festival.
> Sentido VOLTA: servizos cara centro cidade e Amio.

A partir das 23:00, as dúas liñas especiais só realizarán os servizos de VOLTA, polo que o último servizo de IDA sairá ás 23:00 dende o centro da cidade e Amio respectivamente.

As tarifas serán as habituais do transporte urbano, que podes consultar nesta ligazón.

Liña Especial 1 (centro cidade ⇄ Monte do Gozo)
A LE1, no servizo de IDA, conectará o Hórreo (carril bus diante da escalinata da estación de tren) coa rotonda baixo a SC-20, punto onde comeza a rúa das Estrelas. Dende este punto haberá que ir a pé ata o recinto, un traxecto duns 20 min aproximadamente. O ano pasado este servizo continuaba un pouco máis aló, ata o cruce desta rúa con Agra dos Campos. Todo parece indicar que a redución do percorrido foi debida aos incidentes acontecidos na edición anterior. 

O servizo de VOLTA partirá da avda. Fernando Casas Novoa, na confluencia coa rotonda baixo a SC-20, e terá como destino a avda. de Lugo, no cruce co Hórreo. O percorrido realizarase a través da SC-20 para transportar aos viaxeiros da forma máis veloz posible.

Mapa do percorrido e plano explicativo dos puntos de orixe / destino da LE1:

Liña Especial 2 (Recinto Feiral de Amio ⇄ San Lázaro)
A LE2 dará servizo a aquelas persoas que veñan á cidade en vehículo privado e decidan deixalo aparcado no aparcadoiro que se habilitará no Recinto Feiral de Amio. Para aparcar aquí será preciso ter unha entrada ao festival. O servizo de IDA conectará este parking (#Parada429 do transporte urbano) con San Lázaro, nas inmediacións do Palacio de Congresos. Dende aquí ata o Monte do Gozo o traxecto andando ten uns 26 min de duración ou tamén se pode coller a #Liña6 dirección San Marcos (consultar final do post).

A viaxe de VOLTA partirá da parada máis próxima ao Palacio de Congresos, a #Parada560 da #Liña6. Ao igual que a LE1, a LE2 discorrerá pola SC-20 nun traxecto de apenas 5-7 min de duración. Este o mapa do percorrido e das paradas de cada cabeceira:

Outras liñas con paradas preto do festival
As liñas 6 e 7 complementarán ás dúas liñas especiais:

> #Liña6 (cada 20 min): para acceder ao festival (dirección San Marcos), a parada máis próxima ao Monte do Gozo é a #Parada204, Costa de San Marcos (fronte ao hotel Santiago Apóstol), a uns 8 min a pé ata o recinto. Para regresar á cidade coa L6 (dirección Os Tilos), débese coller o bus na de en fronte, a #Parada282.


Paradas da #Liña6 no entorno do hotel Santiago Apóstol.

> #Liña7 (cada hora): é a liña que para máis cerca do Monte do Gozo. Para ir ao festival hai que coller os buses que teñan como destino final Aríns, NON VALEN os que van a Fornás. A #Parada320, na rotonda de Agra dos Campos, será tanto o punto de baixada coma o de subida para os que escollan a L7 para volver a Santiago.


#Parada320 da #Liña7.

Problemas cos buses durante a primeira edición
O ano pasado só funcinou un dos servizos lanzadeira, o que conecta o festival coa estación de trens. Aparentemente non houbo maiores problemas, pero no remate da última xornada, ás 3:45 horas, o Posto Avanzado de Mando decidía suprimir o servizo de autobuses ante a aglomeración de persoas no entorno da parada de Agra dos Campos.

TUSSA enviara 20 autobuses á vez para intentar cubrir toda a demanda, pero resultaron insuficientes ao estar abandonando o recinto practicamente a totalidade das persoas que accederan ao mesmo en transporte público. O xerente da empresa, José Ramón Mosquera, chegou a propoñer que non se cobrararan as viaxes, co obxectivo de axilizar o desaloxo de xente, pero a Policía Nacional preferiu suspendelo.

Os asistentes, máis que da propia decisión, queixáronse de non ser avisados por ninguén. Moita xente seguía a agardar polo bus no lugar indicado tempo despois que fora suspendido. Tampouco agradou a xestión de TUSSA, xa que era obvio que 20 buses non eran suficientes para as miles de persoas que naquel momento abandoaban o festival. Hai que ter en conta que era a primeira vez que se levaba a cabo un servizo lanzadeira de tales dimensións, con horarios amplos e moita demanda de viaxeiros.

Este ano o dispositivo semella estar mellor planificado. Botamos en falta, iso si, sinalización «in situ» na cabeceira da LE1 en Fernando Casas de Novoa: ao non ser unha parada de bus habitual pode resultar algo confuso. Iso si, aínda que a decisión de non deixar pasar á LE ata a rotonda de Agra dos Campos redundará nunha maior fluidez para os viandantes na contorna do festival, quizais elevará demasiado o tempo de traxecto a pé, que rondará os 20 min.

📝 Nota aclaratoria diante das publicacións xurdidas nos últimos días ao respecto da suspensión do servizo de autobuses lanzadeira para o festival O Son do Camiño na madrugada do sábado

— Concello de Santiago (@PazodeRaxoi) 5 de xullo de 2018

Fontes de información:
TUSSA
O Son do Camiño
Concello de Santiago
La Voz de Galicia

Servizos extra para a Cidade Imaxinaria e o concerto de Bob Dylan

Con motivo da celebración da Cidade Imaxinaria Primavera na Cidade da Cultura o vindeiro sábado 27 e o concerto de Bob Dylan no Multiusos o luns 29, TUSSA ofrecerá dous servizos especiais durante os dous días para facilitar o acceso aos recintos dende o centro da cidade.

> Sábado 27: Cidade Imaxinaria

Regresa, un ano máis, a Cidade Imaxinaria á Cidade da Cultura. Terá lugar o sábado 27 de abril a partir das 17:00. Como a #Liña9 non funciona os sábados pola tarde, as opcións para subir ata o Gaiás en transporte público serán as seguintes:

➢ #ServizoEspecial: será un autobús que funcionará entre a pza. de Galicia (#Parada410, diante do Massimo Dutti) e a CdC cunha frecuencia de 40 min. A primeira saída dende o Gaiás será ás 14:00 e a última ás 21:20. Dende o Ensanche, o primeiro bus partirá ás 14:20 e o último ás 21:00. Dende a pza. de Galicia, este bus seguirá por Virxe da Cerca seguindo o itinerario da #Liña9, coa única excepción de que non accederá ao Multiusos de Sar na viaxe de ida nin na de volta. As tarifas serán as habituais.

Os horarios detallados son: saídas dende a Cidade da Cultura: 14:00, 14:40, 15:20, 16:00, 16:40, 17:20, 18:00, 18:40, 19:20, 20:00, 20:40, 21:20.
Dende a praza de Galicia: 14:20, 15:00, 15:40, 16:20, 17:00, 17:40, 18:20, 19:00, 19:40, 20:20, 21:00.

➢ #LiñaC11: aínda que o lóxico e o máis practico sería acceder a través do servizo habilitado para a ocasión, a #LiñaC11 conta con tres prolongacións á Cidade da Cultura os sábados tarde, que eles mesmos recomendan na web aínda que os horarios sexan erróneos. Os servizos desta liña con paso por Xeneral Pardiñas ás 17:30, 19:45 e 20:00 subirán ata o Gaiás.

> Luns 29: concerto de Bob Dylan

O luns 29 de abril ás 21:00 Bob Dylan ofrecerá no Multiusos Fontes de Sar o que será o único concerto en Galicia da súa última xira. Ante a escaseza de servizos de transporte ordinarios ata o recinto, TUSSA porá en marcha o habitual #ServizoLanzadeira que se emprega para os eventos no Multiusos. Deste xeito, poderase acceder a través:

Punto de saída do #ServizoLanzadeira.

➢ Do #ServizoLanzadeira: de xeito continuado (isto é, que sempre haberá un bus ao que subirse) dende as 17:00 ata as 21:00. Sairá dende o carril bus do Hórreo, onde comeza a escalinata que baixa á estación de trens. Irá directo ata o Multiusos, sen facer paradas. Manterase en sentido inverso ao remate do concerto, a partir das 22:45.

➢ Da #LiñaC11 (cada 12 min): todos os servizos comprendidos entre as 17:00 e as 21:00 prolongaranse ata o Multiusos. Non sabemos se se reforzará a liña cun autobús máis, pero dende logo cremos que sería o máis conveniente tendo en conta o percorrido extra nun día laborable (hai máis tráfico que durante as fins de semana). No centro, discorre por Xeneral Pardiñas e pza. de Galicia.

➢ Da #Liña9 (cada hora): no seu percorrido habitual accede ao Multiusos. Sae ás XX:30 de Casas Novas e sobre as XX:40 para na Senra. Logo continúa por Virxe da Cerca, Pastoriza, Anxo Casal, Rodríguez de Viguri e Fontiñas.

➢ Das #LiñaC5 e #LiñaC6 (cada hora): unicamente as recomendamos para acceder dende zonas periféricas da cidade que non queden cubertas por algunha das outras alternativas, xa que teñen pouca frecuencia e son moi habituais os retrasos.

Fontes de información:
Cidade da Cultura
TUSSA (I) e TUSSA (II)
Imaxes:
Cidade da Cultura
Ticketmaster
Google Maps

O sábado 8, concerto de @helloweenorg e reforzos no transporte urbano

Nunha das semanas máis raras do ano como é esta, coa ponte da Constitución de por medio, en Compostela poderemos gozar do concerto do grupo de heavy metal Helloween. Isto será o sábado 8, día no que tamén se reforzarán algunhas das liñas para «compensar» o festivo do xoves. Do mesmo xeito, o domingo 9 verase reforzada tamén a #LiñaC11.

Concerto de Helloween

 Sábado 8 de decembro

 19:30 (apertura de portas ás 19:00)

Multiusos Fontes do Sar

Aínda que o cartel indique as 21:30, en realidade
o concerto é ás 19:30. Fonte: RockNRock

Para este concerto habilitarase o dispositivo habitual para eventos no Multiusos Fontes do Sar, que consiste en:

#ServizoLanzadeira: segundo a información proporcionada por TUSSA, funcionará de xeito continuado de 17:30 a 20:00. O punto de saída será o habitual: o #CarrilBus da rúa do Hórreo, xusto diante da escalinata que baixa á estación de trens. Ao final do concerto, ao filo das 22:30 se todo marcha como está previsto, o #ServizoLanzadeira funcionará en sentido inverso (Multiusos → avda. de Lugo, cruce co Hórreo).

Con «de xeito continuado» entendemos que serán varios os autobuses que se destinarán á realización deste servizo, polo que deducimos que sempre vai haber polo menos un na cabeceira do Hórreo. Comentar tamén que este servizo é directo, polo que non realizará ningunha parada entre as dúas cabeceiras.

#LiñaC11: como tamén é habitual nesta clase de eventos, a #LiñaC11 prolongarase ata o Multiusos. Desta vez, farao en todas as viaxes con paso aproximado por Xeneral Pardiñas entre as 17:30 e as 20:00 (cada 20 min.).

Aínda que TUSSA nos confirmara en Twitter que o amañaría, o certo é que ata o de agora, os servizos da #LiñaC11 prolongados de xeito extraordinario ao Multiusos non aparecen reflectidos na app. É dicir, consta coma que fan a súa viaxe habitual, o que pode causar confusións aos usuarios que busquen acceder ao recinto en bus...

Entra agora como reforzo para a xente que vai ao Concerto. En todo caso incorporarémolo. Grazas e bo traballo !!!!

— maisbus (@maisbus) 24 de xullo de 2018

A nosa recomendación

Nós recomendamos ir e regresar do Multiusos utilizando o #ServizoLanzadeira: é máis directo, ten (case) asegurada unha frecuencia e non ten problemas de retraso ao ir directo pola avda. de Lugo. Pola contra, a #LiñaC11, só contará con dous autobuses ao ser festivo que, unido ao intenso tráfico que haberá no entorno do C.C. As Cancelas, acabará por derivar en retencións e retrasos. Mellor non arriscarse.

Reforzos para a finde

- Sábado 8

O sábado 8 de decembro, para compensar os horarios de día festivo que xa haberá durante o xoves 6, as seguintes liñas do transporte urbano se verán reforzadas dende o inicio do servizo ata as 15:00:

Liñas 6, 7, C5, C6, P1, P2 e P3

A partir das 15:00, estas liñas tamén terán horario de domingos e festivos.

Por outra banda, a #LiñaC11 terá unha frecuencia de 15-20 min. a partir das 10:00 e ata as 15:30.

- Domingo 9

O domingo 9 de decembro só será reforzada a #LiñaC11 do mesmo xeito en que o fará o sábado: con pasos de 15-20 min. entre as 10:00 e as 15:30.

As restantes liñas terán o domingo horario de domingos e festivos.

Finde axetreado: Tribalistas o venres e Carreira Pedestre o domingo

O próximo fin de semana vén movidiño: o venres 26 de outubro Tribalistas ofrecerá un concerto no Multiusos Fontes do Sar e o domingo 28 celebrarase a 41ª edición da xa máis que tradicional Carreira Pedestre Popular de Santiago. Debido a estes dous eventos, TUSSA ofrecerá o venres servizos de transporte adiccionais para os asistentes ao concerto, mentres que o domingo pola mañá haberá desvíos en practicamente a totalidade das liñas.

> Concerto de Tribalistas (venres 26)

Tribalistas, o trío formado por Marisa Monte, Arnaldo Antunes e Carlinhos Brown, ofrecerá un concerto o vindeiro venres 26 de outubro no Multiusos de Sar. A cita será ás 21:00 e, como xa é costumbre ante este tipo de eventos, TUSSA porá a disposicións dos asistentes do concerto servizos de transporte adiccionais:

• #ServizoLanzadeira: partirá dende o carril-bus do Hórreo (xusto diante de onde comezan a escalinata que baixa ata a estación de trens) ata o Multiusos de forma directa, sen paradas. O horario será de 18:00 a 21:00 ininterrompidamente. Ao remate do concerto —a partir das 22:45, aproximadamente— manterase o #ServizoLanzadeira dende o Multiusos ata o cruce da avda. de Lugo co Hórreo. As tarifas deste servizo serán as habituais do transporte urbano. Podes consultalas aquí.
• #LiñaC11 (cada 12'): prolongarase polo Multiusos en todas as viaxes que pasen por Xeneral Pardiñas entre as 18:00 e as 21:00.
• #Liña9 (cada 60'): pode ser outra opción para acceder ao Multiusos con máis «relax», fuxindo do axetreo que caracteriza á #LiñaC11. Iso si, haberá que andar pendente, xa que esta liña só pasa cada hora (ás XX:40 pola Senra, aproximadamente).
• #LiñaC5 e #LiñaC6 (cada 60'): poden empregarse tamén para acceder ao Multiusos dende o centro da cidade, mais a súa función principal é a de atender a outras zonas periféricas da cidade (San Lázaro, Amio...).

> Carreira Pedestre Popular (domingo 26)

E este finde tamén, terá lugar a 41ª edición da Carreira Pedestre Popular. O percorrido abrangue gran parte da cidade, polo que todas as liñas que funcionan os domingos terán desvíos, e mesmo nalgunhas suprimiranse algunha saída. Este é o itinerario da proba:

Imos ver as alteracións que sufrirán as liñas unha por unha:

#Liña1 (cemiterio de Boisaca ⇆ Hospital Clínico)

Entre as 10:00 e as 12:30, haberá percorridos alternativos:

• Hosp. Clínico → Boisaca: percorrido habitual ata o cruce da avda. Rosalía de Castro con Romero Donallo. Dende aquí, os buses irán por esta última avda. → Hórreo (parada na zona da escalinata que baixa á estación de trens) → avda. de Lugo → Cruceiro da Coruña.
• Boisaca → Hosp. Clínico: mesmo percorrido que no caso anterior pero á inversa. Neste sentido, a parada alternativa no Hórreo será a #Parada694 da #LiñaC2.

#Liña4 (As Cancelas ⇆ Romaño)

• As Cancelas → Romaño: suprimidas as viaxes con saída das Cancelas ás 10:30 e 11:30 (coa conseguinte perda tamén da prolongación por Casas Novas).
• Romaño → As Cancelas: non sairán do Romaño as viaxes das 10:00, 11:00 e 12:00.

#Liña5 (A Rocha ⇆ Vite)

• Vite → A Rocha: suprimidas as viaxes das 10:00 e das 12:00. Sairá dende Vite o servizo das 9:30, e o próximo será o das 12:30. No seu lugar:
• Est. de autobuses → A Rocha: os servizos que deberían salir entre as 10:00 e as 12:00 de Vite farano dende a estación de autobuses. Dende aquí, os buses da #Liña5 irán por Rodríguez de Viguri → avda. de Lugo → Hórreo (#Parada694) e percorrido habitual ata A Rocha (ou A Rocha Vella, segundo o horario).
• A Rocha → est. de autobuses: mesmo percorrido que no caso anterior pero a parada alternativa do Hórreo realizarase no cruce desta rúa coa avda. de Lugo (zona da escalinata que baixa á estación de trens).

#Liña6 (San Marcos ⇆ Os Tilos)

Entre as 9:45 e as 12:15 os autobuses da #Liña6 terán percorridos alternativos:

• San Marcos → Os Tilos: itinerario habitual ata Fonte dos Concheiros. Dende aquí, os buses seguirán por avda. de Lugo → Hórreo (#Parada694) → Amor Ruibal e percorrido ordinario ata Os Tilos. Ao redor das 11:00, neste sentido, os buses poderán acceder á rúa da Rosa, facendo parada aquí e deixando de realizar a provisional no Hórreo. 
• Os Tilos → San Marcos: percorrido habitual ata o Hórreo. Despois, por avda. de Lugo ata a #Parada409 na rúa das Fontiñas.

#Liña7 (rúa Valle Inclán ⇆ Aríns)

• Valle Inclán → Aríns: as saídas dende Valle Inclán das 11:00 e 12:00 faranse dende o carril-bus do Hórreo, polo que quedan suprimidas as paradas de Valle Inclán, Virxe da Cerca e pza. de Galicia.
• Aríns → Valle Inclán: as saídas de Aríns das 10:30 e das 11:30 terán como destino o Hórreo, diante da estación de trens. Polo tanto, quedan suprimidas as paradas de Hórreo nº 23, Virxe da Cerca e Valle Inclán.

#Liña8 (Vidán ⇆ Camiño dos Vilares)

• Vidán → C. Vilares / Tanatorio: as viaxes con saída da urb. Brandía ás 10:30 e 11:30 irán por: avda. Mestra Victoria Míguez → avda. Mestre Mateo → Romero Donallo → Hórreo (parada na zona próxima a escalinata que baixa á estación de trens) → avda. Lugo → avda. Rodríguez de Viguri → r/ dos Irmandiños e itinerario habitual a partir do barrio de Guadalupe.
• C. Vilares / Tanatorio → Vidán: as saídas das 10:00, 11:00 e 12:00 farán o mesmo percorrido que no caso anterior pero á inversa, realizando a #Parada694 de xeito alternativo.

#LiñaC2 (est. autobuses → Fontiñas → Hospitais → Vite → est. autobuses)

A viaxe con saída ás 10:15 da estación de autobuses quedará suprimida. Reanudarase o servizo co servizo das 11:15.

#LiñaC11 (circular de Fontiñas)

As saídas do Camiño Francés (C.C. As Cancelas) das 10:20, 10:55, 11:30 e 12:05 terán o seu percorrido habitual ata a avda. de Lugo. Seguirán por esta ata o Hórreo, onde darán media volta e volverán cara Fontiñas. Realizaranse as prolongacións polo Multiusos de Sar e a Cidade da Cultura nas horas sinaladas.

#LiñaP1 (est. autobuses ⇆ Folgoso)

Suprimidos os servizos con saída ás 10:30 de Folgoso e ás 11:00 dende a estación de autobuses.

#LiñaP2 (est. autobuses ⇆ Ortoño)

Nas viaxes con saída ás 10:00 dende Ortoño e ás 11:30 dende a est. de autobuses, o bus da #LiñaP2 irán, dende Rosalía de Castro, por Romero Donallo → Hórreo e avda. de Lugo ata a estación, perdendo así todas as paradas no centro da cidade.

#LiñaP3 (rúa Valle Inclán ⇆ A Susana)

As viaxes con saída de Valle Inclán ás 11:00 e ás 12:00, así como os que saen da Susana ás 10:30 e 11:30, terán como punto de orixe / destino a rúa do Hórreo, non indo así ata Valle Inclán.

Arredor das 11:00, cando se abran as rúas pechadas do Ensanche, as viaxes en dirección A Susana poderán realizar a #Parada479 na rúa da Rosa.

Chega a #SupercopaEndesa ao Multiusos de Sar!

Este ano Compostela será a cidade anfitrioa da Supercopa Endesa 2018. Por este motivo, TUSSA ofrecerá servizos de transporte especiais que se sumarán ás liñas habituais para que todas as persoas que así o desexen poidan ir ver os partidos en bus urbano. [ACTUALIZACIÓN] Monbus tamén ofrecerá un #ServizoLanzadeira dende o estadio de San Lázaro. O evento terá lugar durante as tardes do venres 21 e o sábado 22 de setembro. Imos ver as diferentes opcións día por día:

> Venres 21

As opcións serán as seguintes:

• #ServizoLanzadeira: sairá dende o #CarrilBus da rúa do Hórreo (diante da escalinata que baixa á estación de tren). Irá ata o Multiusos directo, sen facer paradas. Dependendo da hora, funcionará de diferentes xeitos:

• Entre as 18:00 e as 19:00: só en sentido IDA (Hórreo >> Multiusos).
• Entre as 20:00 e as 22:00: funcionará nos dous sentidos, é dicir, poderase coller no Hórreo para ir ata o Multiusos e no Multiusos para ir ata o Hórreo.
• Dende as 23:00 e ata o desaloxo de toda a xente: exclusivamente en sentido VOLTA (Multiusos >> Hórreo).

•  #LiñaC11 (frecuencia de 12'): prolongarase en todas as viaxes con paso por Xeneral Pardiñas comprendidas entre as 18:05 e 21:41. As paradas máis céntricas para coller esta liña serán as de Xeneral Pardiñas e pza. de Galicia (ferraxería).
• Outras liñas que acceden ao Multiusos (todas cada 60'): #Liña9 (paradas máis céntricas: San Clemente, Senra, 13), #LiñaC5 (pza. de Galicia, Zara e r/ da Rosa) e #LiñaC6 (Hórreo).
• [ACTUALIZACIÓN]: a maiores do #ServizoLanzadeira de TUSSA, haberá un de Monbus. Será de 18:00 a 20:30 (cada 30') con saída dende o estadio de San Lázaro (porta 10).

OLLO! O venres celebrarase tamén na Cidade da Cultura un concerto de Emilio Rúa (poderase acceder a través da #Liña9). Por este motivo, xunto coa propia Supercopa Endesa, prevese unha gran afluencia de coches na zona. Polo tanto, recomendamos coller o bus con antelación. No caso do concerto na CDC —que é ás 21:00— recomendamos coller o bus con saída de Casas Novas ás 19:30, xa que o das 20:30 xa irá con retraso.

> Sábado 22

• #ServizoLanzadeira: ao igual que o venres, o servizo fará o percorrido Hórreo (escalinata da estación de tren) >> Multiusos directo, sen paradas intermedias. O horario de funcionamento do servizo este día será:

• Entre as 17:00 e as 19:15: sentido IDA (Hórreo >> Multiusos).
•  Dende as 20:30 ata a finalización: só sentido VOLTA (Multiusos >> Hórreo). O servizo prolongarase ata que xa non haxa máis xente agardando polo bus.

•  #LiñaC11 (cada 15'): pasará polo Multiusos en todas as viaxes que pasen por Xeneral Pardiñas entre as 17:00 e 19:15.
• Outras liñas: o sábado á tarde, a parte da #LiñaC11, só funciona unha liña máis con paso polo Multiusos: a #LiñaC5 (cada 60').
• [ACTUALIZACIÓN]: o sábado tamén haberá #ServizoLanzadeira de Monbus. Este día será de 17:00 a 18:30 (cada 30') dende a porta 10 do estadio de San Lázaro ata o Multiusos. Percorrido de volta, Multiusos - estadio S. Lázaro, a partir das 21:15.

Puntualización: non sabemos cantos buses conformarán o #ServizoLanzadeira de TUSSA. Nos partidos do Obradoiro CAB adoita haber un ou dous autobuses para o servizo de ida, e todos os que sexan necesarios para o de volta. Desta vez, ao tratarse dunha ocasión máis «especial» na que se espera máis afluencia de público, pode que vaia a haber máis vehículos.

Fontes de información:
TUSSA
Cidade da Cultura
Obradoiro CAB (Twitter)
Fotografías:
Marca
Cidade da Cultura

#Liña6, #Liña 7 e #ServizoLanzadeira para o concerto de @ricky_martin no #MontedoGozo

Este sábado 18 de agosto Ricky Martin ofrecerá un concerto na cidade. A cita terá lugar ás 22:00 no Monte do Gozo, aínda que a apertura de portas comezará a partir das 20:00.

Ante o gran número de xente que se prevé que acuda ao evento, TUSSA porá a disposición d@s asistentes ao concerto un #ServizoLanzadeira, que complementará á #Liña6 e a #Liña7:

#ServizoLanzadeira (IDA e VOLTA)

• IDA: os datos que aporta TUSSA son que este servizo funcionará entre as 16:00 e 22:00, pero descoñecemos cantos buses o formarán, polo que tampouco sabemos a frecuencia de paso. O punto de orixe será o carril bus do Hórreo (diante da escalinata da est. de trens) e o de destino será a rotonda na que conflúen a rúa das Estrelas con Agra dos Campos. En teoría, o/os bus/buses que estean a facer esta ruta farano de xeito continuado, é dicir, irán ata o Monte do Gozo con pasaxeir@s e volverán baleiros, de xeito continuado sen parar.

Punto de saída do #ServizoLanzadeira cara o Monte do Gozo

• VOLTA: tras a finalización do concerto, o #ServizoLanzadeira funcionará dende as 00:00 ata as 2:30. O punto de saída será de novo a rotonda da rúa das Estrelas con Agra dos Campos, e o de destino a rúa do Hórreo (diante do Parlamento). Unha puntualización: se se desaloxa o recinto antes das 2:30, as lanzadeiras deixarán de funcionar. Desta vez ampliouse o horario (tendo en conta que o concerto rematará sobre as 00:30/1:00), feito que aplaudimos despois do vivido no #SondoCamiño...

Punto de saída do #ServizoLanzadeira ao remate do concerto

#Liña6 (só IDA)

Haberá que coller o bus en dirección San Marcos. A parada máis próxima ao Monte do Gozo é a #Parada204, Costa de San Marcos, fronte ao hotel Santiago Apóstol.

#Liña7 (só IDA)
Liña dirección Aríns e baixarse na #Parada320, na rotonda da rúa das Estrelas con Agra dos Campos (o punto de destino do #ServizoLanzadeira tamén).

Tarifas
As tarifas serán as habituais do transporte urbano. Podes consultalas aquí.

Fonte de información: TUSSA

#Liñas 9, C5, C6 e C11 + #ServizoLanzadeira para o concerto de @BadBunnypr

O martes 24 de xullo, preámbulo do día grande das festas do Apóstolo, terá lugar unha das que será, sen dúbida, das citas musicais máis importantes do ano na cidade: o concerto de Bad Bunny no Multiusos Fontes do Sar. E como non podía ser doutro xeito, e ante o sold out conseguido polo artista, TUSSA porá a disposición dos usuarios e usuarias servizos de transporte para as persoas que asistan ao concerto.

Xa é tradición en Compostela o clásico concerto do 24 de xullo. Nesta ocasión, teremos a honra de ter na cidade (ou máis ben, el terá a honra de estar aquí), ao trapeiro Bad Bunny. Ofrecerá un concerto no Multiusos Fontes do Sar ás 21:00, e TUSSA porá algunha que outra facilidade para aqueles interesados e interesadas en asistir. Imos por partes. Primeiro imos ver os servizos de liñas regulares, as habituais para acceder ao Multiusos:

#Liñas 9, C5, C6 e C11 (ida)

• #Liña9: ten unha frecuencia de 60'. Sae de Casas Novas ás horas e medias. As paradas máis céntricas para coller esta son a #Parada553 San Clemente, fronte ao IES Rosalía de Castro e a #Parada598 Senra nº 13, Burger King. Logo segue ata o Multiusos por Virxe da Cerca >> Pastoriza >> Rodríguez de Viguri >> Fontiñas.

Clic para ampliar

• #LiñaC5: sae do polígono Costa Vella ás horas e media (frecuencia de 60'). As paradas máis céntricas para coller esta liña son a #Parada410 Pza. Galicia nº 3 (Zara) e a #Parada479 Rúa da Rosa. Logo vai ata o Multiusos por Restollal >> rúa da Estrada >> Diego Bernal.

Clic para ampliar

• #LiñaC6: sae do polígono Costa Vella ás horas e cinco (frecuencia de 60'). As paradas máis céntricas desta liña son as situadas na rúa do Hórreo: #Parada691 Hórreo, estación de trens; #Parada276 Hórreo, Parlamento de Galicia e #Parada277 Hórreo nº 23. Segue o seu camiño ata o concerto polo mesmo percorrido que a #Liña9 dende Virxe da Cerca.

Clic para ampliar

• #LiñaC11. Ten unha frecuencia de 15'. Prolongarase ata o Multiusos en todas as viaxes comprendidas entre as 16:00 e as 22:00. As paradas máis céntricas para coller esta liña son a #Parada673 Xeneral Pardiñas nº 35; #Parada674 Xeneral Pardiñas nº 7 e #Parada409 Praza de Galicia, ferraxería.

Clic para ampliar

#ServizoLanzadeira (ida e volta)

Asemade, haberá un #ServizoLanzadeira que sairá dende o carril bus da rúa do Hórreo, diante da escalinata que baixa á estación de trens. Este servizo estará operativo entre as 16:00 e as 22:00. TUSSA non o concretou, pero supoñemos que se tratará dun só autobús que irá ata o Multiusos con pasaxeir@s e volverá baleiro. Non ten horario, simplemente vai e volve todo o rato, leve o tempo que lle leve.

Punto de saída do servizo lanzadeira no Hórreo

O #ServizoLanzadeira será tamén o único modo de regreso dende o Multiusos ata o centro ao remate do concerto. Estará operativo de novo a partir das 00:00 cun percorrido directo ata a rúa do Hórreo, sen facer paradas intermedias. Neste caso, supoñemos que o servizo si contará con varios autobuses para atender a todas as persoas que saian do concerto.

A nosa recomendación

Baixo o noso punto de vista, a opción idílica para ir dende o centro ata o Multiusos é utilizar o servizo lanzadeira. Pero posto que este non ten un horario fixo e tampouco aparece na app, recomendamos empregar a #LiñaC11, xa que é a que máis frecuencia de paso ten, e o seu percorrido é o que da menos rodeo para chegar. Iso si, tamén é a que máis chea de xente irá.

Á volta non queda máis remedio que utilizar o #ServizoLanzadeira. Non adoita haber problemas, xa que para a hora de finalización do evento –sobre as 00:00– o servizo diurno xa está máis que rematado e hai buses e condutor@s de sobra para poder realizar esta ruta sen problemas.