O transporte urbano tamén se adapta ao coronavirus: #QuedaNaCasa

🦠TODA A INFORMACIÓN RELATIVA AO COVID-19 ACTUALIZADA NESTE FÍO DA NOSA CONTA DE TWITTER🦠

[Actualizado a 16/03]

SÓ SE PODERÁ PAGAR CON TARXETA, QUEDA ANULADO O PAGO EN EFECTIVO a partir do XOVES 19 DE MARZO. Nestes días estanse a recolocar as canceladoras nas portas traseiras dos autobuses. Deste xeito, ao non poder pagar en efectivo, habilitaranse tres puntos para a compra e recarga das tarxetas ubicados en: praza de Galicia (ferretería), rúa Lisboa (preto da parada de taxis) e avda. de Vilagarcía nº 28. Ambos os tres puntos se corresponden cunha parada do transporte urbano:

Clica aquí se non podes visualizar correctamente o mapa

Na rolda de prensa tras a Xunta de Goberno, o alcalde Xosé A. Sánchez Bugallo indicou que o xoves haberá unha nova xuntanza na que, moi probablemente, se reaxustarán os horarios do bus urbano para adaptalos á escasa demanda existente durante estes días. Permaneceremos atentos.

Primeira versión do post [domingo 15/03]:

Parecía afastado hai tan só unha semana, pero o certo é que chegou para quedarse (polo menos durante os próximos quince días). O coronavirus xa forma parte do noso día a día. Dende o pasado xoves no que o presidente Feijóo anunciaba o cese da actividade docente ata a publicación do Real Decreto que establece o estado de alarma a partir do domingo, a poboación asistiu a un goteo constante de cese das actividades económicas. Finalmente, vémonos obrigados a quedar nas nosas casas para frear a expansión do virus e evitar o colapso do noso sistema sanitario.

Recomendacións da Xunta para
o uso do transporte público.

Malia isto hai unha serie de servizos que por seren imprescindibles continúan a continuar con normalidade, polo menos con toda a normalidade posible nestas circunstancias. Un deles é o transporte urbano. O Real Decreto deixaba a súa xestión en mans dos concellos, e en Santiago tomouse a decisión de mantelo ao cento por cento, agás algunhas excepcións puntuais.

Considerámolo obvio a estas alturas mais incidimos: #QuedaNaCasa. O emprego do bus urbano só está xustificado para aquelas persoas que non interrompen os seus traballos e aos que estes días agradecemos máis ca nunca a súa labor: persoal dos hospitais, do servizo de limpeza, dos supermercados... e do transporte urbano. TUSSA porá en vigor as seguintes medidas a partir do luns 16 para garantir a seguridade dos condutores/as no desempeño da súa labor.

Medidas xerais para toda a rede
➣ Só poderán viaxar en cada bus 30 persoas como máximo para evitar aglomeracións (que serán máis ca improbables durante o estado de alarma...).

Unhas cintas asegura o espazo
de seguridade do condutor/a.

➣ Haberá unha cinta de separación entre os asentos dianteiros e o posto de condución. Esta medida foi adoptada xa en moitas outras cidades do Estado co obxectivo de limitar ao mínimo o contacto entre condutor e cliente.

➣ Accederase aos autobuses pola porta central. As indicacións textuais de TUSSA indican que «Os usuarios deberán validar o seu título de viaxe dende a parte de atrás do condutor, ou no seu caso deixar a súa tarxeta ou moedas no punto habilitado para evitar o contacto co condutor». O lóxico sería que se trasladara a canceladora á carón da porta traseira. Aínda que teñamos serias dúbidas de se se realizará isto, resulta ser o lóxico se vai haber unha cinta separadora.

➣ Os condutores/as deben empregar luvas. Comezaron a facelo xa o domingo.

Mantéñense os horarios, pero con pequenos reaxustes
Practicamente a totalidade da frota sairá ás rúas (menos un ou dous buses) durante estes días de corentena. Iso si, adaptaranse algúns servizos á escasa demanda existente:

➣ #Liña8: elimínase o bus de reforzo que circula polas mañás, pasando de 3 a 2 vehículos que operarán a liña durante todo o día. Deste xeito, os horarios quedarán así:

Saídas C. Vilares → Vidán: de 7:00 a 22:30 (cada 30 min).

Saídas de Vidán → C. Vilares: de 7:30 a 22:30 (cada 30 min).

Saídas Tanatorio → Vidán: as mesmas que nos horarios actuais.

Saídas Vidán → Tanatorio: 7:30 8:00 8:30 9:00 10:00 10:30 12:00 12:30 13:00 14:30 15:00 16:30 17:00 18:30 19:00 20:30 21:00 21:30 22:00 22:30

Saídas de Vidán con prolongación aos Vilares: 9:30 14:00 16:00 20:00

➣ #Liña15: mesmos horarios, pero os servizos rematarán na avda. de Barcelona en vez de no Campus Sur, tal e como se fai durante os períodos non lectivos.

➣ [Actualización a 16/03] → #LiñaP2: suprímense os servizos de reforzo que rematan na pza. de Vigo. Son as saídas de Ortoño das 7:20 e 8:00.

➣ Liña P3: elimínase o servizo específico que ía dende a pza. de Galicia ata o entorno educativo de Lamas de Abade, así como os pasos por alí dos buses da propia liña P3 no seu percorrido cara Valle Inclán ou A Susana. Ademais, elimínase tamén o bus de reforzo das mañás e do mediodía. TUSSA non especifica os novos horarios, pero segundo os nosos cálculos quedarían así:

Saídas Valle Inclán → A Susana: 8:20 10:00 11:15 12:15 13:30 15:00

Saídas A Susana → Valle Inclán: 7:45 9:00 10:45 11:45 13:00 14:05 15:30

A partir das 16:00 h, os servizos continuarían cos seus horarios habituais, saíndo durante as tardes dende a pza. de Galicia.

➣ #LiñaP4: cremos que a información ofrecida por TUSSA para a liña P4 é confusa. Indícase que funcionará «como lectivo», pero despois se di que sen realizar «o servizo dobre ao mediodía nin o servizo de tarde». En cristián, entendemos que só se mantén un servizo, o de ida dende A Sionlla ata o centro das 7:20.

Polo de agora, mantéñense tamén todos os servizos ao aeroporto de Empresa Freire e non hai cambios no transporte metropolitano tampouco, segundo o publicado nas webs das empresas concesionarias.

Estas son as únicas restricións que haberá no transporte urbano, polo de agora, durante os días de corentena. Lembrámosvos que podedes seguir actualizados na nosa conta de Twitter @BusCompostela e, concretamente sobre o COVID-19 neste fío.

Fontes de información:
TUSSA
Xunta de Galicia
Boletín Oficial del EstadoConcello de Santiago
Imaxes:
Elaboración propia
Xunta de Galicia - CIM
Mapa:
Elaboración propia a través de My Google Maps

Desvíos nas liñas 9, C4, C6 e C11 polas obras no cruzamento dos Concheiros

O pasado luns arrincaron as obras que remodelarán o cruzamento dos Concheiros para convertelo nunha gran praza pública máis segura para os peóns e, nomeadamente, para os peregrinos. Tras a remodelación do nó poderase cruzar directamente dun punto a outro, sen necesidade de facer zigzag como até agora. Durante os traballos —que teñen un prazo máximo de duración dun ano— haberá importantes modificacións no tráfico. As rúas Berlín e Londres pasarán a ser de sentido único e as liñas 9, C4, C6 e C11 do transporte urbano sufrirán desvíos.

O cambio básico e aplicable ás catro liñas e que deixarán de acceder ao barrio de Fontiñas pola rúa Berlín (agora só aberta o tráfico en sentido subida) para facelo pola de Londres (só baixada). Quedarán anuladas polo tanto para as liñas 9, C4, C6 e C11 as seguintes paradas:

🚏❌ 129, Berlín (xulgados)🚏❌ 294, Lisboa nº 5

Ademais, para a liña C4 quedará tamén anulada a parada 89, avda. de Lugo (xulgados), xa que os autobuses torcerán directamente dende esta avenida cara a rúa Londres. Para a liña 13 si seguirá vixente.

Pola súa banda, as liñas 9, C6 e C11 transitarán polos carrís centrais da avenida dende Concheiros / Rodríguez de Viguri ata a nova rotonda na confluencia da avda. de Lugo con Londres, onde poderán facer o xiro directamente cara Fontiñas.

Un autobús de Freire atravesando a glorieta provisional.

Ao contrario que noutros desvíos por obras de longa duración similares, esta vez actuouse ao xeito e habilitouse unha parada provisional rexistrada no SAE (Sistema de Axuda á Explotación). Así, as de Berlín e Lisboa desapareceron do percorrido das liñas por Fontiñas e no seu lugar foi incorporada a nova, denominada oficialmente «Londres (centro saúde)» e situada xusto a carón do Centro de Saúde de Fontiñas. O seu código é o 88, que foi o que deixou libre a parada do Hórreo (residencia Barroso) tras ser suprimida con carácter definitivo.

Esta nova parada foi sinalizada mediante os habituais sinais redondos que indican a prohibición de estacionar —non de parar— acompañadas das palabras «P BUS». É o suficientemente grande como para que os autobuses poidan achegar as tres portas á beirarrúa e ocupa unha superficie na que antes podían aparcar uns cinco coches. O aspecto negativo atopámolo na falta de información sobre horarios e liñas in situ, extensible á toda a rede. Unha boa idea podería ser trasladar o poste de Lisboa nº 5, que quedará inutilizado durante un ano.

Poste de Lisboa nº 5 inutilizado.

Cómpre salientar que ao tratarse do entorno dun centro hospitalario sería necesario, por parte da Policía Local, extremar as precaucións. É tentador para os condutores ver espazo libre diante do centro de saúde, e máis nos casos de trámites rápidos. De feito, durante esta primeira semana moitos optaron por parar alí o seu coche, impedindo a correcta aproximación do bus á beirarrúa. Neste aspecto pode que o problema quede resolto coa adquisición do multamóbil que TUSSA pretende efectuar de cara ao verán, unha vez aprobados os Orzamentos 2020.

Diversas fases
A fase iniciada o pasado luns na obra dos Concheiros é a primeira. Están contempladas diversas fases —non se especifica cantas— que seguirán a mudar o tráfico e a mobilidade da zona. É probable que nas seguintes, a maiores destas catro liñas, teña que modificar tamén o seu percorrido a 6, que segundo o primeiro documento subido á web por TUSSA —corrixido case ao instante— pasaría a circular pola rúa Monte dos Postes.

Fontes de información:
TUSSA
El Correo Gallego
Fotografías:
Elaboración propia
Google Street View
App maisbus

O Concello acometerá modificacións puntuais na mobilidade da cidade de cara ao Xacobeo 2021

O Concello publicou o pasado mes o Documento sobre actuacións urxentes no entorno da catedral de Santiago e nas zonas anexas da Cidade Histórica para o ano 2021. Neste manual recóllense unha serie de actuacións básicas que o Goberno local considera imprescindibles de cara ao vindeiro Ano Xacobeo. Trátanse de intervencións menores, de custo non moi elevado, pero necesarias para asegurar o fluxo adecuado dos turistas e visitantes para tentar compatibilizalo co día a día da veciñanza.

No tocante á mobilidade e ao transporte público cítanse algunhas cuestións que ben merecen ser mencionadas neste post: modificacións nas paradas de bus da praza de Galicia, reparto de mercadorías a cargo de TUSSA, relocalización dos trens turísticos e cambios nas liñas por mor da futura reurbanización da rúa dos Concheiros.

Praza de Galicia máis adecuada ás persoas
Xa quedou máis que demostrado durante os últimos anos e no 2021 será peor: a beirarrúa da praza de Galicia non é ancha dabondo como para acoller a todos os viaxeiros que agardan polo bus urbano (alí paran as liñas 5, 6, 7, 12, 13, 15, C5, P3, P4 e P6) mais o do aeroporto. A situación agrávase no verán e por este motivo as decisións que o Concello levará a cabo serán:

➣ O traslado da actual cabeceira da liña de bus ao aeroporto á isleta paralela á rúa da Senra. Dotarase ao espazo do mobiliario urbano preciso para facer efectivo o cambio, é dicir, de marquesiña e un panel de información en tempo real, segundo o Concello. Aínda que polo de agora, lembramos, os buses ao aeroporto de Freire non contan con SAE pero, como xa adiantamos hai meses, é probable que a súa xestión sexa asumida directamente por Raxoi para incorporalos ao transporte urbano.

Futura localización da parada do bus ao aeroporto.

➣ Ampliación das beirarrúas e mellora da accesibilidade nos pasos de peóns. Tanto a beirarrúa da parada 409 (ferretería) como a da 410 (Massimo Dutti) serán prolongadas e os bordos e o firme de baldosas de cemento serán substituídos por bordos e lousas de granito. Esta é a oportunidade idónea para instalar nunha das paradas máis empregadas de toda a rede o pavimento podotáctil, necesario para as persoas con algunha discapacidade visual e practicamente inexistente en Compostela.

É escaso o número de paradas nas que está
instalado o pavimento podotáctil.

➣ Reforma dos pasos de peóns. Actualmente non son accesibles ao cen por cento. Contan cunha pequena rampla —con demasiada inclinación— que facilita a labor aos usuarios de cadeiras de rodas, mais na práctica non é útil. Por este motivo, o Concello propón accesibilizalos segundo a fórmula do coxín berlinés, é dicir, elevándoos para buscar a comodidade do peón ao non haber elevacións e, de paso, facer reducir a velocidade ao tráfico rodado. 

Aínda que as intencións —facilitar o tránsito do transporte público e o peonil— sexan boas, coidamos que a localización escollida para a nova parada non é a máis axeitada. Ao perder os vehículos ese carril de entrada ao parking, colapsado habitualmente en verán, o taponamento será maior e terá lugar en medio e medio da praza, en vez de nese carril concreto. Deste xeito, pódese ver interrompido o tráfico procedente tanto da Senra como de Virxe da Cerca ao non poder circular por mor do atasco que terá lugar nos carrís de paso da praza. En definitiva, que se non se acompaña a medida dun plan de redución do tráfico no centro da cidade, o remedio pode ser peor ca enfermidade.

Por non comentar o feito de que nun contexto de atasco, o bus do aeroporto non podería efectuar a saída desde a nova parada ao estar a zona colapsada polos turismos que tratan de acceder ao aparcadoiro subterráneo.

Reparto de mercadorías no Casco Antigo
O estado do pavimento da zona histórica está esnaquizado, así como diversas fontes do recinto do intramuros, por mor do paso de grandes camións de carga e descarga. Neste sentido, o Concello expón establecer unha ou varias zonas na fronteira da améndoa nas que realizar as descargas, que logo serían entregadas ao destinatario final mediante pequenos vehículos eléctricos, ben a través de TUSSA ou mediante unha empresa externa. Esta medida iría acompañada dunha redución no horario de CeD, que se estende ata as 10:30 h nalgunha zona.

Trens turísticos fóra do Obradoiro

O dos trens turísticos é outro dos sen sentidos vixente na actualidade: en verán, un tren de tres vagóns (os da ruta monumental) percorre cada media hora a rúa de San Francisco ata chegar ao Obradoiro, ao que se suma outro máis nalgunhas horas puntuais (o da ruta dos parques). Agora o Concello quere limitar o itinerario desta atracción turística ata a dársena de Xoán XXIII ou «outra localización máis axeitada». Xa era hora.

As [ansiadas] obras de reurbanización en Concheiros
Este ano darán comezo as tan demandadas obras de reurbanización da rúa dos Concheiros. Desde que se semipeonalizou San Pedro en 2013, só discorre por estas dúas rúas a #LiñaC11, que se verá desviada mentres duren os traballos. No documento indícase nun par de parágrafos que os percorridos alternativos (previsiblemente por San Roque, Pastoriza, Anxo Casal e Rodríguez de Viguri) suporán un sobrecusto para Tralusa que «deberá recibir a correspondente contía compensatoria».

Supoñemos que, como xa se ten feito noutras ocasións, non se reforzará o servizo da #LiñaC11 cun bus máis durante o desvío. Porén, o non facelo implicará non cumprir a frecuencia de 12 min establecida para a ruta, que non descartamos que sexa ampliada a 15. Xorden tamén dúbidas sobre o encaixe que terán estas obras no novo mapa de liñas que se pretende licitar no primeiro trimestre deste 2020.

Como curiosidade, lemos onte en La Voz de Galicia as alteracións no tráfico previstas de cara ás obras na avenida de Lugo, á altura da rotonda dos Concheiros, executadas pola Xunta dentro do plan de mellora das entradas do Camiño na cidade. Quedamos á agarda do que comunique o Pazo de Raxoi, pero parece ser que as liñas que pasen pola zona (L6, 9, 13, C2, C4, C5, C6 e C11) van ter que verse desviadas mentres duren os traballos.

Fontes:
Concello de Santiago
La Voz de Galicia
Google Maps

Novidades: marquesiña no aparcadoiro de Santa Marta e panel de chegadas na #Parada691

Pouco a pouco imos vendo como, tras anos e anos de abandono das infraestruturas relacionadas co transporte urbano, a cidade vai recuperando o pulso (cousas do Xacobeo...). Nestas últimas semanas destacamos dúas novidades: a instalación dun panel de chegadas en tempo real na #Parada691 (Hórreo, estación de trens) e dunha marquesiña na parada do aparcadoiro de Santa Marta da #Liña1.

Marquesiña en Santa Marta
No primeiro caso —segundo puidemos saber durante o último Pleno da Corporación—, a marquesiña de Santa Marta foi demandada polo voceiro do Partido Popular, Alejandro Sánchez-Brunete, nun Consello de Administración de TUSSA. A petición foi admitida e o Goberno municipal reservou unha partida nos seus orzamentos «técnicos» para este propósito. Non foi ata o pasado luns cando a puidemos ver instalada, e polo que a nós respecta, deixa moito que desexar. Así loce:

Non é o suficientemente grande como para atender a alta demanda do estacionamento. En Santa Marta aparcan moitos condutores polas mañás e en horas punta pode chegar a haber en torno a quince persoas agardando ao bus. Na marquesiña caben dez e sentadas, catro. Ademais, no relativo á información ao usuario, non se instalou ningún poste indicador apeadeiro e tampouco o plano coas liñas e horarios que adoita poñerse naquelas paradas que contan con marquesiña.

E aínda que xa sexa fantasear, tampouco estaría de máis ter construído unha plataforma elevada sobre o chan que facilitase o acceso ao autobús. Estamos a falar dunha zona en pendente na que non hai beirarrúas, polo que a tarefa pódeselle complicar a máis dun, especialmente ás PMR. Este tipo de pequenos detalles nunca se teñen en conta en Compostela.

Panel no Hórreo
Na zona do Hórreo, localización da actual estación de trens e da futura Intermodal, vén de instalarse un panel de chegadas en tempo real. Concretamente fíxose na #Parada691 e o modelo é idéntico ao que hai pouco máis dun ano se colocou en Virxe da Cerca.

As vantaxes, como xa indicamos no seu día, pasan pola utilización das cores de cada liña, normalmente infrautilizadas e mesmo cambiadas na app maisbus. Este panel tampouco presenta problemas para visualizalo cando lle da a luz solar de fronte, como si o fan outros (praza de Galicia e rúa da Rosa, entre outros).

Non nos pode gustar máis o aspecto que loce o novo panel de chegadas da #Parada660😻

✅ Empregando —por fin— as cores de cada liña

🌞 Esperemos que non haxa problemas de visibilidade cando lle dea o sol (como ocorre no da #Parada366, por exemplo)

Bo traballo! @maisbus pic.twitter.com/rG9HQbwFgX

— Bus Compostela 🚍 (@BusCompostela) September 20, 2018

Porén, presenta unha serie de inconvenientes:

• Non se mostra sempre o destino real: esta clase de indicadores mostran a orixe e o destino da liña de forma estática, e non dependendo do punto final real do servizo. Neste caso concreto, por exemplo, a información ofrecida sobre a liña P3 é «Susana - Rúa Valle Inclán», e sempre será esa aínda que a ruta remate ás veces na praza de Galicia. Isto acontece tamén coa liña 6, que non sempre remata en San Marcos para poder prolongarse ata Bando e Vilamaior.
• Só se mostra o próximo bus: a diferenza dos paneis LED laranxas, estes azuis só mostran o próximo bus de cada liña. É dicir, se lle quedan 2 minutos ao 6 temos que intuír por nós mesmos que o seguinte chegará en 22', e para iso hai que controlar as frecuencias.

Tanto a marquesiña como o panel non deixan de ser boas novas para as persoas que empregan o transporte urbano, pero son estas cuestións menores as que sempre acaban por confirmar o que xa sabemos: o noso servizo de transporte urbano é de segunda, e non parece importarlle moito aos nosos dirixentes.

Tralusa renovará nove autobuses por outros «novos ou case novos»

Semella que pouco a pouco os axentes protagonistas da posta en marcha da nova concesión do transporte urbano da cidade van movendo ficha: hai un mes o concelleiro Gonzalo Muíños expresaba a súa intención de convocar o concurso público antes de fin de ano; a principios de outubro, os condutor@s demandaban a inclusión das súas demandas nos pregos e agora tocoulle á empresa operadora, a UTE Tralusa (Aulusa + Trapsa). A compañía pediu autorización ao Concello para a substitución de nove vehículos dada «a antigüidade da frota» e «as reiteradas avarías». Foille concedida.

Tras a autorización da Xunta de Goberno local a Tralusa para o troco dos vehículos, queda por ver se se traerán unidades procedentes doutras empresas do Grupo Monbus ou se adquirirán de primeira man. Por experiencias pasadas, todo parece indicar que serán de segunda man, aínda que o alcalde, Sánchez Bugallo, incidiu en que os buses serán «novos ou case novos».

Por facer memoria...

Un dos Scania alcalaínos, o 2338 (antes do cambio
a «C. Vilares» no panel😉)

A frota, segundo declarou antonte o rexedor, ten unha media de idade de 15 anos. O problema xa vén de atrás e nos últimos anos a situación non fixo máis que agravarse, con avarías recorrentes, pingueiras dentro dos buses, aire acondicionado / calefaccións que non funcionaban, etc. Así, a partir do verán de 2017 Tralusa comezou a incorporar á frota varios Scania N270 UB Carsa City Versus procedentes de Alcalá de Henares, cuxa empresa operadora tamén pertence ao Grupo Monbus. En total, en Santiago calculamos que hai arredor de nove unidades.

Paralelamente tamén se introduciron varios CS-40 City II —tamén de Alcalá— para tratar de salvar os casos imposibles, aqueles vehículos que xa morreran ou que pouco lles quedaba para. Podemos distinguilos dos CS-40 orixinais de Tralusa porque as barras do interior están pintadas de vermello (igual que nos Scania) en vez do tradicional amarelo. Estas unidades viñeron xa con moitos km enriba e agora, con 16 anos e medio de antigüidade, non se atopan en condicións decentes para prestar un bo servizo.

O bus máis novo de toda a rede (o Citaro de Grabanxa),
xunto a un dos máis vellos, o 1956 de Tralusa (aínda
hoxe circulou na #LiñaC6). Foto: Asannei.

Xa no verán do ano pasado comezou a circular o que ata agora é o vehículo máis recente de toda a frota (exceptuando o Citaro de Autos Grabanxa para a #LiñaP6): un Citaro O530 matriculado en 2011. O seu número de empresa é o 2424 —o máis alto— e ten tres portas, coas barras interiores en cor azul. Procedía do aeroporto de El Prat.

Para atopar as últimas adquisicións de primeira man temos que remontarnos ata 2012, ano no que o Concello —non Tralusa— mercou tres Citaro K cofinanciados con fondos da Unión Europea. A súa característica máis singular é que están repintados metade en azul e metade en amarelo. Nos días laborables adoitan circular nas liñas 9, C2 e C5.

Buses saíntes
Como é de esperar, os buses novos entrarán para substituír aos que máis anos teñen enriba. Actualmente, as liñas máis castigadas coas vellas glorias acostuman ser a 1 e a C11, que alternan entre elas o peor do parque móbil. A P1 e sobre todo a C6, cun bus cada unha, tamén levan parte do premio. En definitiva, coidamos que a intención é tentar retirar os vehículos anteriores ao 1965 (aínda que hai algún con numeración maior antigo dos traídos de Alcalá), que teñen matrículas coa letra C.

Buses entrantes
Tendo en conta que os autobuses que circulan polas rúas de Santiago son pouco máis de corenta, unha renovación de nove representa case un cuarto da frota, polo que é un cambio significativo. Agora a dúbida é con que nos sorprenderá Tralusa. Para prestar os servizos do festival O Son do Camiño a empresa trouxera varios Scania City Versus de Alcalá así coma uns Citaro C2 e un Citaro L, que máis tarde pillamos en probas en Virxe da Cerca. Queremos pensar que podemos descartar os Scania, enormes e ruidosos, coa escusa de «novos ou case novos». Non así os Citaro C2, que poderían encaixar co de «case novos».

"Cazado" este Citaro L procedente de Ibiza en probas en Virxe da Cerca con condutores de @maisbus

Este vehículo xa prestara servizo nas lanzadeiras do @OSonDoCamino e do concerto de Alejandro Sanz

Significará isto algo...?😏 pic.twitter.com/R3rryHxRp2

— Bus Compostela 🚍 (@BusCompostela) July 22, 2019

Sen dúbida, a renovación destes vehículos será ben recibida polos usuari@s e condutor@s, pero o momento no que se decide facela resulta sospeitoso, ás portas duns novos pregos. Isto é debido a que é probable que o proceso sufra o vixésimo atraso: se Muíños citaba decembro como data para o concurso, o alcalde falou antonte do «primeiro trimestre de 2020». A cuestión é, será o último...?

Fontes de información:
Concello de Santiago
La Voz de Galicia
CIG
Fotos:
Asannei
Bus Compostela

A CIG logra a maioría nas eleccións sindicais de Tralusa

A Confederación Intersindical Galega (CIG) vén de conseguir tres dos cinco representantes do comité de empresa de Tralusa nas recentemente celebradas eleccións sindicais. Segundo a propia CIG, as votacións realizáronse nun contexto de «moitas presións» por parte da empresa, que apoiaba «descaradamente» a candidatura de UGT.

Unha vez constituído o novo Comité retomaranse as negociacións coa Inspección de Traballo para solucionar temas pendentes como os contratos en fraude de lei ou o rexistro da xornada laboral. Tamén se tratará de negociar co Concello a inclusión das demandas dos traballadores e traballadoras nos novos pregos da concesión que están a piques de ser publicados. Entre as peticións destacan a mellora das condicións sociais, do estado dos autobuses e da calidade do servizo prestado.

Tralusa, pertencente ao Grupo Monbus, é a empresa encargada de explotar a concesión do servizo do transporte urbano de Santiago. Das 22 liñas que ten a rede, Tralusa encárgase de 18 (todas menos a 7, P6, P7 e P8). A intención do Concello é a de unificar todas as rutas nunha soa empresa na próxima concesión.

Candidatura da CIG, na súa maioría
conformada por condutores/as de Tralusa.

Fonte: CIG
Imaxe: CIG

Clara Campoamor terá carril bus-taxi

Chíos da oposición despois
de coñecer o proxecto de CA.

Os accesos á futura estación de autobuses a través do vial Clara Campoamor foi un dos asuntos que avivou as confrontacións entre o anterior executivo local de Compostela Aberta e o resto de candidatos durante a campaña electoral. Daquela o PSdeG xa o deixaba claro: no caso de facerse coa alcaldía paralizarían o proxecto do grupo de Martiño Noriega, que cualificaban de «disparate». E o cambio acaba de chegar porque o pasado luns foi presentada a nova proposta de reurbanización dos socialistas.

Antecedentes
As reticencias por parte dos de Bugallo viñan condicionadas, principalmente, polo número de carrís. CA contemplaba reducir os catro actuais a dous para converter Clara Campoamor nun «bulevar urbano», con carrís bici en ambas marxes e límite de velocidade máximo de 30 km/h para os vehículos. Ademais, defendían que o acceso á estación debería

Recreación virtual da rotonda.

ser regulado por semáforos e non a través dunha rotonda, como sostiña a oposición e a conselleira de Mobilidade, Ethel Vázquez. Tras a presentación do proxecto, a novidade vén dada en que os cambios con respecto ao anterior son, máis ben, menores. Imos velos.



Tres carrís: dous para vehículos e un para buses e taxis
Os carrís son a principal variación no novo deseño do viario. A través da redución da franxa axardinada máis próxima á estación e do ancho das beirarrúas introdúcese un carril bus-taxi dun único sentido (Sar -> Pontepedriña). Deste xeito, preténdese que os buses teñan prioridade para entrar e saír da terminal ao non ter que agardar a que un semáforo se poña en verde. Isto supón axilizar de xeito notable o fluxo de autocares da terminal, especialmente en horas punta onde chegan a acumularse ata dez, como acontece actualmente na de San Caetano.

Unha das dúas capturas facilitadas polo Concello.

A cara negativa deste carril exclusivo é que obriga a dar un rodeo aos buses que veñan polo Castiñeiriño, que terán que circular por Santiago de Cuba, túnel do Hórreo e avenida de Lugo para incorporarse a Clara Campoamor pola rotonda de Sar e poder acceder así á Intermodal. Esta volta supón, máis ou menos, un incremento do tempo de viaxe duns 5-7 min. Deste mesmo xeito, os buses que saian da terminal en dirección norte terán que ir dar a volta á xa de por si saturada rotonda de Pontepedriña.

O carril bus de Clara Campoamor será o terceiro da cidade, uníndose aos existentes no Hórreo e na Rosa. Este último, na práctica, non é máis ca unha «parada ampla» para o transporte metropolitano, posto que non facilita per se a circulación de autobuses. É máis, o habitual é que estean dous ou tres autocares estacionados nel e cando vén o urbano teña que adiantalos polo carril dos coches.

Os dous carrís bici xuntos
No proxecto de CA, os carrís bici estaban situados un a cada beira do vial, no mesmo sentido de circulación que os coches. No novo, trasládanse ambos á marxe máis próxima ás Brañas do Sar para que o que discorría a carón da estación non interrompa a entrada e saída de autobuses. Estarán separados con barreiras físicas do tráfico rodado.

Sen cambios significativos
Polo resto, non hai máis novidades dunha proposta á outra. Os carrís para coches seguirán a ser dous e limitados a 30 km/h e, segundo Bugallo, non se descarta a instalación dun radar no caso de ser preciso. Mantense tamén a praza peonil proxectada dende un primeiro momento, na que convivirán vehículos e peóns de xeito similar a como o fan no cruce de Montero Ríos con Xeneral Pardiñas e a como o farán no de Concheiros. Así mesmo, queda descartada definitivamente a opción da gran rotonda como método de acceso que a Xunta e o propio PSOE defendían no seu día.

Bus urbano en Clara Campoamor
No único plano de calidade deficiente facilitado polo Concello pódese apreciar que se manteñen os espazos reservados para o bus urbano, aínda que nas liñas expostas no Xeoportal non constara ningunha con itinerario por Clara Campoamor. Todo parece indicar que este será un dos asuntos a resolver na «revisión» que os socialistas queren dar ao prego de condicións da nova concesión antes de sacala a concurso.

Futura ubicación das paradas do bus urbano
(captura do proxecto de CA).

Os lugares reservados ao transporte urbano son dous, un en cada extremo da vía. En dirección Sar, o bosquexo recolle unha parada con baía o suficientemente grande como para albergar dous autobuses á vez, a continuación da praza peonil. Segundo a lenda, habilitaranse dúas marquesiñas. Nese mesmo punto pero na beirarrúa de en fronte, cara Pontepedriña, hai un espazo para dous buses diante da parada de taxis, a simple vista menos accesible e sen resgardo algún no caso de choiva. Habería que sumar o posible tráfico de:

➢ Os autobuses do aeroporto da futura #LiñaAP que, de non cambiar nada, terán o Hórreo (zona da escalinata) como cabeceira.

➢ O tráfico relacionado co transporte metropolitano que ata o de agora penetraba na rúa da Rosa. Está previsto trasladalo ao entorno da Intermodal e é probable que se reparta entre dous puntos: o carril bus da rúa do Hórreo (infrautilizado actualmente) e as propias dársenas da nova estación.

➢ Os autocares que presten servizos discrecionais. Poderían agardar polos seus viaxeiros nas paradas do transporte urbano de Clara Campoamor, no carril bus do Hórreo ou no interior da terminal.

Coa estación de autobuses e a pasarela xa en construción, o tempo aprema e a previsión do goberno local é que as grúas poidan estar en acción en xaneiro. É obvio que haberá que cortar Clara Campoamor durante os traballos polo que se aproveitará a ocasión para concienciar aos condutores sobre o uso do túnel do Hórreo como viario alternativo, xa que pode soportar aínda 20.000 vehículos máis ao día. Todo deberá estar rematado para agosto do ano que vén, data aproximada da posta en funcionamento da nova estación, a falta de que este mesmo mes saia á luz o proxecto básico de remodelación da estación de tren.

Fontes de información:
La Voz de Galicia
Compostela Aberta
Concello de Santiago (1ª proposta)
Concello de Santiago (2ª proposta)
Cadena COPE
El Correo Gallego
Bus Compostela
Imaxes:
Twitter (@PopularesStgo)
Twitter (@psdegsantiago)
Concello de Santiago
Bus Compostela

O Concello limpa o panel da #Parada589, en Santiago de Chile

O antes e o despois.

No marco da campaña de mantemento e reparacións de pavimentos, o Concello reasfaltou en agosto parte da rúa Santiago de Chile, co conseguinte repintado da sinalización horizontal das dúas paradas do bus urbano desta vía, a 589 e a 590, que dan servizo ás liñas 15 e C2. Xa expresamos en Twitter a nosa insatisfacción —que non descontento— polo resultado final, posto que se optou polo método «menos visual» aínda que, obviamente, legal e válido segundo a DXT.

Concretamente utilizáronse liñas descontinuas amarelas, en vez do tradicional zigzag a miúdo empregado nas paradas do bus, moitas veces acompañado da palabra «BUS». Cremos que para os condutores de vehículos privados é menos intuitivo no sentido en que ao ver as descontinuas (indican textualmente «estacionamento prohibido ou suxeito a algunha restrición temporal»), terá que consultar o sinal que delimita o espazo reservado ao autobús para completar o seu significado. Pola contra, co zigzag enténdese á primeira a mensaxe: nese lugar está prohibido estacionar ou parar. Este método xa se empregou no reasfaltado da Poza Real, aló por marzo.

Aínda así, a mellor solución para estas dúas paradas sería a extensión das beirarrúas ata a estrada, especialmente na parada do cruce coa rúa da Rosa, na que espazo é xa pequeno de por si, e aínda por riba hai un contedor situado nun dos extremos.

A novidade atopámola no poste informativo da #Parada589, un dos que se atopaba en peor estado de toda a rede, ateigado de todo tipo de pegatinas e abandonado durante anos por gobernos locais de todas as cores. Para a nosa sorpresa, nos últimos días déuselle un lavado de cara e xa volve lucir como sempre debeu facelo. Tampouco estaría de máis, por estúpido que poida soar, indicar de algún modo a prohibición de pegar adhesivos neles porque xa volve haber un e é probable que podamos volver ás andadas.



Coidamos e esperamos que esta sexa unha tendencia a seguir noutros postes da rede de paradas, en trazos xerais moi deteriorados polo paso dos anos. Nalgúns casos esta sucidade impide ver a información sobre liñas e horarios, perdendo así este elemento a única función que debe cumprir.

Comparativa: Compostela vs.
A Coruña, xulguen vostedes...

Outra das cuestións a ter en conta de cara á vindeira concesión é o xeito de reflectir a información nos postes. A diferenza do que acontece coas marquesiñas, nos monólitos só están as liñas que pasan por esa parada, cos seus horarios e percorrido aproximado. Nós cremos que debe facerse así, posto que exhibir as 22 liñas no plano non fai máis que confundir ao usuario. Porén, hai formas e formas de expoñer os horarios das rutas. O primeiro e máis fundamental pasaría por elaborar un termómetro para cada liña, isto é, un esquema no que estiveran todas as paradas cos seus correspondentes códigos e transbordos, en vez de simples rúas como se mostran na actualidade.

É certo que o noso sistema de transporte urbano non é tan homoxéneo como o doutras cidades como A Coruña, senón que conta con numerosas liñas que á súa vez teñen diferentes cabeceiras e/ou percorridos dependendo do momento do día. Pero como diría o amigo, xa está todo inventado: en Vigo, Vitrasa, cunha complexa rede de máis de corenta liñas con numerosos itinerarios que incluso varían en verán coa extensión do servizo ás praias, a información móstrase nas paradas dun xeito claro e entendible para o usuario.

En definitiva, moito queda por facer en Compostela, tanto como a dimensión das expectativas ante o novo concurso do transporte urbano😁

Fontes de información:
@Osantodoscroqu1
Concello de Santiago
Imaxes:
Bus Compostela
DXT
Atlántico

Analizamos o novo Plan de transporte da Xunta (II): concello de Ames (zona de Bertamiráns) e de Brión

Visita a parte I: concello de Oroso

Ames e Brión son, xunto con Teo, os concellos dormitorio por excelencia onde habita unha gran parte da poboación pendular que cada día se despraza a Santiago por motivos laborais, estudos ou outras razóns como o ocio e o entretemento. O censo de ambos os dous concellos non para de medrar e, de feito, o de Ames duplicouse desde o ano 2000 e medrou en máis de 1.000 persoas no último ano e medio. Isto fai que a propia Consellería de Infraestruturas e Mobilidade, nos anteproxectos das concesións de transporte de viaxeiros, entenda así as relacións de mobilidade destas vilas con Compostela:

[...] se produce una demanda de movilidad muy intensa entre las poblaciones de la periferia y la de cabecera, que incluye la necesidad de realizar incluso varios viajes de ida y vuelta entre ellas a lo largo del día, como consecuencia de los estrechos lazos laborales, asistenciales, comerciales, sociales y de servicios que se producen entre esas poblaciones. En la práctica, las relaciones de movilidad entre las diferentes poblaciones del ámbito territorial de este Proyecto de Explotación se asemejan más a las relaciones entre los diferentes barrios de una gran ciudad que a las clásicas relaciones interurbanas entre varias poblaciones

Neste sentido, apóstase por liñas de curto percorrido e alta frecuencia para estes núcleos dormitorio nos que a demanda de viaxeiros é moito maior que en calquera outro punto da comarca e que, na práctica, non deixan de ser un barrio máis. No caso de Bertamiráns (Ames) e do concello de Brión, serán as concesións XG804 e XG817 as encargadas de cubrir as conexións con Santiago que incluirán, por primeira vez dende a súa supresión en 2011, o Noitebús. 

Unha das últimas adquisición do Grupo Ferrín, un Irizar I4 Volvo,
na rúa da Rosa na ruta Santiago - A Gándara. Fonte: Asannei.

XG804 - Oeste da comarca de Santiago
A XG804 substituirá a tres concesións actuais:

— V-7026, Muxía - Santiago, con anexos; Aguiño - Noia, con anexos (Hermanos Ferrín).
— V-7027, Santiago - Carballo, con Anexos (Arriva Galicia).
— V-3013, Santiago - A Graña, con anexos (Autocares Modesto Riveiro).

Centrándonos no impacto que terá na área metropolitana de Santiago, a XG804 cubrirá máis da metade da demanda da estrada AC-543 (tramo Santiago - Os Ánxeles), con especial relevancia de certos núcleos atractores / xeradores de viaxeiros como son Brión, Bertamiráns, Aldea Nova, Laraño ou o Centro Superior de Hostalería de Galicia. Os principais cambios que destacamos son:

➢ Dos dous buses que cubrirán o traxecto entre a rúa da Rosa e o cruce dos Ánxeles, un deles pertencerá á XG807 e o outro á XG804 (xa acontece na actualidade: un é da V-7026 e o outro da XG517). O desta última terá as derradeiras saídas dende Santiago ás 22:15 e 23:30 de luns a venres laborables, ampliando o arco horario actual, no que o último traxecto é ás 21:45 h. O servizo seguirá comezando ás 7:15 e mantense a frecuencia de media hora.

➢ A ruta de reforzo entre A Rosa e Pedrouzos (Brión), que tiña oito saídas en cada sentido nos días laborables, pasará a ter a sete. Así, pérdese o servizo das 13:00 desde Santiago e o das 15:30 desde Brión, os de menor uso. Esta supresión permite habilitar os sábados dúas saídas cara Pedrouzos inexistentes ata agora: ás 10:00 e ás 13:00 h.

➢ Os sábados, domingos e festivos elimínase a viaxe Negreira - Santiago das 21:30 para engadir un ás 8:45 (manterase o servizo actual das 9:45).

➢ Crearase unha nova liña ata A Ameixenda con dúas saídas en cada sentido de luns a venres. O seu percorrido coincide co da #LiñaP8 do transporte urbano ata Villestro. Neste sentido é necesario destacar que, previsiblemente, Reborido quedará sen ningún autobús xa que nin as concesións da Xunta nin as futuras liñas expostas no Xeoportal do Concello contemplan percorridos ata este pequeno núcleo de 60 habitantes.

➢ A liña actual ata San Mamede de Piñeiro de Hermanos Ferrín (V-7026) será estendida ata Portomouro (Val do Dubra) e as súas saídas pasarán das cinco actuais a sete en días laborables, mantendo as catro dos sábados e os domingos habilitaranse dúas. A saída extra de luns a venres correspóndese co servizo que se engadirá ás 6:50 (agora o primeiro era ás 7:50), para posibilitar as entradas a centros de traballo e de estudos das 8:00 h.

➢ Engádase unha viaxe máis ata A Picaraña, ás 14:45 h, que se suma ás existentes das 13:30 e 19:00. No traxecto inverso mantéñense os dous actuais: un ás 7:45 e o outro pasa das 14:00 ás 15:15 h.

Como curiosidade, estraña que en todas as concesións que contan con saídas desde as estacións de autobuses das cidades galegas —entre elas Santiago— apareza especificado o cambio de localización destas cabeceiras coa entrada en servizo das novas intermodais. No caso da terminal da rúa da Rosa, o Concello adiantara en febreiro que todo o tráfico de autobuses pasaría ao carril bus do Hórreo, na zona próxima á escalinata. Porén, a Consellería de Infraestruturas e Mobilidade non recolle este cambio no Plan de transporte público. Estaremos pendentes de como se resolverá este asunto.

Captura do anteproxecto da XG804 en referencia á futura Intermodal.

Volve o Noitebús!🚍🌃
Era unha demanda moi recorrente que por fin será satisfeita: a concesión XG804 inclúe sete liñas nocturnas, as popularmente coñecidas como Noitebús. Destas sete, dous terán Santiago como cabeceira, mentres que as outras cinco servirán á zona de Santa Comba. Son as seguintes:

➢ Negreira - Brión - Bertamiráns - Milladoiro - Santiago E.A.
➢ Brión - Bertamiráns - Santiago E.A.

Así quedarían os horarios segundo o reflectido nos anexos:

	Venres	Sábados	Domingos e festivos
Negreira -> Santiago		23:30	1:30  3:15  4:45
Brión -> Santiago	23:30	00:30  23:30	00:30
Santiago -> Negreira			00:30 2:30  4:00  5:30
Santiago -> Brión		4:00  6:45	4:00  6:45

Para visualizar correctamente, activar o modo de visualización PC.

XG817 - Eixo Atlántico e conexións con Lugo, Lalín e Fisterra, con anexos

Iveco Evadys H na liña Santiago - Noia - Muros co
distintivo de «Transporte Público de Galicia» que xa
locen todos os vehículos da XG517. Fonte: Asannei

Pasarán polos concellos de Ames e Brión, ao igual que na actualidade, as rutas da XG817 que conectan Compostela con Noia, Muros e Fisterra. Os horarios vanse manter practicamente iguais, e os únicos cambios destacables son: a creación dunha nova saída cara Muros ás 14:00 os días laborables (había un oco sen ningún servizo entre as 13:00 e as 14:35) e o adianto das primeiras viaxes dos sábados, domingos e festivos, que ata o de agora partían dende Santiago ás 10:00 e pasarán a facelo ás 9:00 nunha conexión ata Fisterra (manténdose tamén a actual das 10:00).


As nosas impresións
Tras unha análise detallada dos anteproxectos das concesións XG804 e XG817 podemos afirmar que, en trazos xerais, resultan conservadores e continuistas se os comparamos coas súas antecesoras. Se ben é certo que algunhas demandas históricas puntuais van ter non sen tempo unha solución (Noitebús, últimas frecuencias ata A Gándara), outras, as relacionadas cos municipios máis pequenos e cos horarios das fins de semana, van seguir como estaban. Por tanto, seguirá a existir unha gran parte da poboación da bisbarra que non poida apostar polo autobús como método de transporte nos seus desprazamentos cotiáns.

É o caso, por poñer un exemplo, das rutas ata Portomouro ou A Picaraña. A primeira cobre en exclusiva o traxecto entre a rotonda cara Tapia da AC-543 e a localidade valdubresa, con tan só sete saídas en días laborables que dificilmente permiten cadrar horarios á veciñanza de núcleos como Aguapesadas, Tapia ou Vilouta, para colmo coa última saída ata a cidade moi cedo (16:45). A liña da Picaraña é a única que transcorre pola AC-300, con tres viaxes en todo o día mal repartidas (13:30, 14:45 e 19:00). E xa sin meternos nas conexións non con Santiago, senón as internas entre as propias parroquias, que resultan moi escasas ou directamente inexistentes.


Alegacións do Concello de Ames
O pasado sábado o Concello de Ames deu a coñecer a súa desconformidade con algunhas das liñas e horarios recollidos nos diferentes anteproxectos.

O alcalde de Ames, José Miñones, incide en que “desde o Concello de Ames consideramos preciso modificar a proposta inicial plantexada levando a cabo un maior despliegue de liñas e frecuencias estratéxicas e que van na liña do que xa trasladamos no seu día á Xunta de Galicia e á Consellería de Infraestruturas. Para rematar, engadir que se queremos virar cara a políticas de mobilidade sostibles e seguras temos que reforzar cada vez máis o transporte metropolitano, sendo o momento de educar á nosa cidadanía no uso do transporte público, para seguir avanzando nesta liña e non quedarnos á cola das políticas europeas”

Os cambios requiridos por parte do goberno municipal amiense son:

➢ Unha viaxe máis na liña A Gándara - rúa da Rosa (en dirección Santiago) a primeira hora, para facilitar o transbordo co bus urbano e poder chegar a puntos máis afastados como os polígonos ás 8:00. Actualmente, o primeiro traxecto desta ruta é ás 7:15.

➢ Crear unha última viaxe cara A Gándara ás 23:30 de luns a venres. Esta expedición xa vén incluída nos propios anexos do anteproxecto, polo que deducimos que o Concello só estudou a XG817, sendo a XG804 a que terá asignadas as viaxes de última hora (22:15 e 23:30).

Captura dos anexos da XG804 nos que constan
as últimas saídas dende A Rosa ás 22:15 e 23:30.

➢ Nesta mesma ruta, habilitar frecuencias de media hora os sábados pola mañá dende as 8:00 (na actualidade dunha hora a partir das 10:45) e dunha hora polas tardes e os domingos e festivos ata as 23:30 (os sábados son dunha hora e só ata as 20:45; os domingos non se presta este servizo).

➢ Crear unha liña nocturna circular Santiago - Milladoiro - Bertamiráns - Santiago. É certo que non existe esta liña per se, pero si se contemplan outras dúas —explicadas neste mesmo post— que poden cubrir perfectamente a demanda da mocidade amesán, incluso con máis viaxes das que reclama o Concello no seu comunicado.

No próximo post analizaremos os anteproxectos das rutas que atinxen ao outro núcleo urbano do concello de Ames, Milladoiro, e as do concello de Teo. Para este outro lote de liñas, o goberno amiense tamén presentou unha serie de esixencias á Consellería que dirixe Ethel Vázquez sobre as que poñeremos o foco.

Fontes de información:
CIM (XG804, anteproxecto)
CIM (XG804, anexos)
CIM (XG817, anteproxecto)
CIM (XG817, anexos)
Concello de Ames I
Concello de Ames II
La Voz de Galicia
Concello de Santiago
Monbus
Grupo Ferrín
Xeoportal Concello de Santiago
Fotos: Flickr (Asannei)